MOLIA SE FA'AFEAGAIGA I LE AVE TA'AVALE FA'ATAMALA UA MAFUA AI SE MALIU

Sui Komesina ia Papalii Monalisa Tiai-Keti

Ata Pueina: Eyespyradio 87.5FM

Ua molia nei e le Matagaluega o Leoleo se fa'afeagaiga 64-tausaga-le-matua o le soifua i le moliaga o le ave ta'avale fa'atamala ua mafua ai le maliu o se tamaitai 19-tausaga.

O lea fa'alavelave tau ta'avale afi na tupu i le Aso Lulu o le vaiaso ua mavae i le afioaga o Tapatapao. e pei ona ripotia i se tasi o tusitusiga a le leitio a le Eyespy i luga o lana itulau Facebook i le Aso Faraile o le vaiaso ua tuana'i.

Ae i se ripoti a le TV1 Samoa i le fa'ai'uga o le vaiaso ua te'a, na iloa ai o le fa'afeagaiga 64-tausaga na fa'afoeina le sa lea na lavea i Tapatapao ma maliu ai lea tama'ita'i talavou.

I se fa'atalatalanoaga a le leitio a le Eyespy ma le Sui Komesina ia Papalii Monalisa Tiai-Keti, na ia ta'ua ai o lo'o masalomia o le mafuaaga ua ala ai ona tupu lea fa'alavelave, e fa'apea ua ova le saosaoa tele.

Na ia ta'ua foi o le ua maliu na iai faatasi i totonu o le taavale ma le ua molia ma le isi tagata e toatasi.

Na ave faanatinati uma i latou i le falema'i i Motootua mo togafitiga.

Peitai, o le tamaitai ua maliu na tuga ni manuaga sa i lona ao ma lona tino.

O lo'o fautuaina e le Matagaluega o Leoleo le mamalu o le atunuu aemaise ave taavale ina ia usitaia uma tulafono i luga o ala tetele ina ia faaitiitia ai ia faalavelave ua maumau ai le tele o soifua.

O lo'o tatala i tua le alii faifeau ma le tuutuuga ina ia saini i le Ofisa o Leoleo i Faleata i Aso Lua ma Aso Tofi uma.o vaiaso taitasi.

O le aso 5 o Iuni lea ua fa’atulaga e tula’i ai o ia i luma o le Fa’amasinoga Maualuga.