MANUMALO IAM TONGI I LE TAUVAGA PESE O LE AMERICAN IDOL

Iam Tongi

Ata Pueina: Countryside.com

O se tasi o ali'i e iai lona tupuaga Samoa ia Iam Tongi mai i Hawaii na manumalo i le tauvaga pese lona 21 a le American Idol.

O le Aso Gafua o le vaiaso nei (Aso Sa lea i Amerika) na fa'atautaia ai le suegasiumupini o lea tauvaga pese i totonu o Amerika.

O Tongi, 18 tausaga le matua, na palotaina e le faitau miliona o le au maimoa ona o le matagofie o lona siufofoga i lona usuina o se tasi o pese na ia fatuina ua faaigoaina o le "I'll Be Seeing You" i le final o le American Idol.

Na tauva Tongi i le final faatasi ai ma le tamaitai o Megan Danielle lea na tulaga lua, faapea ai ma le ali'i o Colin Stough lea na tulaga tolu i le mae'a ai o lea tauvaga.

Na usuina e Tongi se tasi o fatuga a le ali'i pese Samoa ia Spawnbreezie ua taua o le "Dont Let Go" ina ua faapaleina o ia e avea ma siamupini.

Sa vaaia le laufofoga fiafia o le aiga o Tongi ina ua faailoaina lona manumalo ai i le American Idol.

I le taimi o Auditions mo le tauvaga, na tutulu ma fetagisi ai le laulau o fa'amasino o le American Idol ia Katy Perry, Luke Bryant ma Lionel Ritchie ina ua usuina e Tongi se tasi o pese faanoanoa o le "Monsters", na ia momoli ai ona alofa'aga mo lona tama ua fai i lagi le folauga.

Na ia taua o lona tama ia Rodney Tongi na maliu i nai masina ae e le'i o'o i Auditions o le American Idol.

O le Audtion a Tongi ua silia nei ma le 16 miliona viewers po'o tagata ua maimoa ma matamata iai.

O le manumalo ai o Iam i le tauvaga o lenei tausaga, ua faamauina ai o le taimi muamua lea ua avea ai se tagata pese mai i atumotu o le Pasefika ma fetu numera tasi o le American Idol.