TOE TA'ALO CHANEL HARRIS-TAVITA I LE TA'AMILOSAGA O LE NRL

Chanel Harris-Tavita i le aso na faagasolo ai le solo a le Toa Samoa, 2021

Ata Pueina: Eyespy Radio Samoa

I le mae'a ai o le Ta'amilosaga o le Ipu o le Lalolagi o le Lakapi Liki i le tausaga ua te'a i Peretania, na faailoa mai ai e se tasi o tama ta'alo o le Toa Samoa ia Chanel Harris-Tavita, e na te le taalo i le ta'amilosaga lakapi liki o le NRL i lenei tausaga.

Na foliga mai o lana taumafaiga mulimuli lea i le taaloga o le lakapi liki faapolofesa e ui e na o le 24 le matua o lona soifua ma e fa'ato'a amata ta'alo foi o ia i le tausaga e 2019.

Peita'i, ua faaalia i ni isi o ripoti ma faasalalauga ua agiga i luga o upega tafailagi le sainia ai lea e Chanel Harris-Tavita o se konekarate e ta'alo ai mo le kalapu o le NZ Warriors mo le 2 tausaga (2024 - 2025).

Na fa'aalia e le Pule Sili o le au a le NZ Warriors ia Andrew McFadden lona fiafia tele i le fa'ai'uga a Harris-Tavita e toe fo'i atu e ta'alo mo lana kalapu.

"Na ou talia le fa'ai'uga a Chanel i le tausaga ua tuana'i e malolo ai mai i le ta'aloga o le lakapi liki,"

"Ae na tatala pea le faitoto'a mo ia pe afai ae toe fia fo'i mai e ta'alo,"

"O se fiafiaga tele ia te au le sainia ai lea e Chanel o le konekarate, ona o lea e na o le 24 ona tausaga ma e le'i taitai lava lona olaga taalo,"  o le saunoaga lea a McFadden.

A'o malolo ai Harris-Tavita mai le ta'amilosaga o le NRL i lenei tausaga, na ia faimalaga ai ma tafao i Europa, Asia i Saute i Sasa'e, Amerika ma Samoa nei.

Na ta'ua e Chanel, a'o iai o ia i Samoa ma galue ai i le fa'atoaga a lona aiga i Afega, na iai le po na ia tafao ai se fale kalapu ma ia matamata ai i se tasi o ta'aloga talu ai nei a le Warriors i luga o le televise.

"E tele le suiga a le au ua iai nei. O le mafuaaga lea ua ou naunau ai ou te toe ta'alo."