MANUMALO PARKER I LE TU'I OTI I LE LA FUSUAGA MA OPELU FAIGA

Lupesoliai Joseph Parker ma Opelu Faiga

Ata Pueina: Newshub

Na manumalo le alo fusu a le atunu'u ia Lupesoliai Joseph Parker i le ali'i o Opelu Faiga i le ta'amilosaga muamua o le la fusuaga i le tu'i oti.

E na o le 86 sekone ae mae'a lea fusuaga.

E le'i mafai e Opelu ona fa'aauauina le fusuaga ina ua lavea i le taumatau malosi a le ali'i o Parker.

Na taofi e le ali'i laufali le fusuaga ona o lona alofa i le ali'i o Opelu ma le tulaga na o'o iai ina ua lavea i le combination a Parker ma ta'atia ai i totonu o le maea fusu.

O le ulua'i taimi lea ua fa'atautaia ai se fusuaga a Parker i totonu o laufanua o Ausetalia.

Fa'ato'a toe manumalo lea o Parker e ala i le tu'i oti talu mai le masina o Fepuari i le 2020 lea na ia fa'aumatia ai le ali'i fusu mai i Amerika o Shawndell Winters.

O le lona lua (2) ai lea o manumalo a Parker talu ona ia faiaina i le ali'i Peretania o Joe Joyce ia Setema o le tausaga ua tuana'i.

O le amataga o le tausaga nei na manumalo ai i 'ai Parker i le la fusuaga ma Jack Massey lea sa faia i totonu o Peretania i Manchester.

Na iai i le tulimau a le ali'i o Parker lana uo mamae, le Siamupini o le WBC ia Tyson Fury.

Na ta'ua e Fury ina ua mae'a le fusuaga a Parker ma Opelu, "O lea ua toe fo'i Parker i le tulaga malosi sa iai i le amataga, ma ou te manao e na te toe lu'iina Joe Joyce, Dillian Whyte, Anthony Joshua, pe fufusu fo'i ma Andy Ruiz."