TE'ENA E LE TAMAITAI SA FAIGALUEGA I LE SUPAMAKETI O LE FARMER JOE TUUA'IGA O LE GAOI E FAASAGA IA TE IA

Ata Pueina: Eyespyradio 87.5FM

O le vaiaso nei na tulai ai i luma o le Faamasinoga Maualuga le tamaitai sa avea ma tagata faigaluega i le Supamaketi o le Farmer Joe i Ululoloa o loo molia i le gaoi ao avea ma tagata faigaluega.

Na teena e lē ua molia tuua'iga e faasaga ia te ia.

I faamaumauga a le Faamasinoga, na taua ai e faapea o le masina o Fepuari i le masina o Mati o lenei tausaga o loo masalomia na amata fa'atino ai e lenei tama'ita'i nei soligatulafono.

E faapea na ave ese faasolitulafono e le tama'ita'i nei le tele o oloa mai i le Farmer Joe i Ululoloa a'o avea ai o ia ma tagata faigaluega I lea Supamaketi.

I le faitau aofa'i o le seleni o nei 'oloa pe 'a fa'atupeina e tusa ma le $1168.78 Tala.

O le Aso 31 o Aukuso ma le Aso 1 o Setema o le 'a toe vala'auina ai le mata'upu aua le iloiloina o mau.