MALIU SE TASI O TOA NA TAALO MO LE MANU SAMOA TAITOAFITU

Fa'apito Matagitau.

Ata Pueina: Google Image

O le Aso To'ona'i o le vaiaso ua mavae atu na tu'ua ai le malo e se tasi o sui na amata taalo i le tausaga e 2000 mo le Manu Samoa Taitofitu, le susuga ia Fa'apito Matagitau.

O le maliu ai o Faapito ua o se tala faanoanoa tele lea mo le afioaga o Nofoalii aemaise o le kalapu lakapī a le afioaga ona o lona naunau sa iai ina ia manuia alo ma fanau o lona nu'u ma le itūmālō i le taleni lakapī.

O Fa'apito na ia maua le avanoa e ta'aalo ai ma nisi iloga fo'i i le ta'aloga o le lakapi ta'itoafitu e pei o le susuga ia Jonah Lomu mai i le 'au a Niu Sila ua fai i lagi fo'i lana folauga, fa'apea ma faiaoga taiulu o le Manu Samoa Taitoafitu o loo iai nei ia Muliagatele Brian Lima.

Ua fa'aalia i luga o upega o tafailaagi lagona misia ma faamafanafanaga a nisi o sui o le atunu'u ona o le maliu ai o lea alo a Samoa ua loa lana tautua i le ta'aloga o le lakapi.

O Fa'apito o se tamālii ua loa lona sao i le atinaeina o lea taaloga i totonu o le atunuu. Ina ua mālōlō mai ma le Manu Samoa, na ia tauave ai nisi o tofiga fa'afaia'oga mo au lakapi a le Itumalo o A'ana ma lona afioaga o Nofoali'i.