TOE TATALA LE MALAE VAALELE I FAGALI'I

Fagalii Airport

Photo: Government Of Samoa

O le Aso Gafua o le vaiaso nei na tatala aloa'ia ai le Malae Vaalele Faavaomalo i Fagali'i mo faigamalaga talu ona tapunia i le lua tausaga talu ai.

O le sauniga faapitoa e tatala ai le malae vaalele sa auai ai le afioga i le tamaitai palemia ia Fiame Naomi Mataafa, faapea nisi o sui o le malo ma le kapeneta, ma ofisa sili o nisi o matagaluega a le malo.

I le saunoaga autu a le Minisita o le Matagaluega o Galuega Felauaiga ma Atinae Tetele (M.W.T.I) ia Olo Afoa Fiti Vaai, na ia taua ai,

"O se vaega taua tele lea mo si o tatou atunu'u ona o le so'otaga a Samoa ma Amerika Samoa. Ma e le o toe mamao foi ona mafai ona faaoga lenei malae vaalele mo faigamalga i nisi o atunuu o le Pasefika.

"O le toe tatalaina o le Malae Vaalele i Fagali’i ose laasaga taua tele ma le fa’ailoga e mafai ai ona fa’aauau pea le atina’e ma le manuia o Samoa.

Na momoli foi le faafetai ma le faamalo a le Minisita ona o le lagolago ma taumafaiga a le Afioga I le Faipule o le Itumalo, Alii ma Faipule o le afioaga o Fagalii, le Taitaifono o le Pulega o Malae Vaalele, Komiti Faatonu, pulega ma le aufaigaluega, faapea foi le sao o isi Matagaluega ma Faalapotopotoga Tumaoti a le Malo sa auai i le faamautinoaina o lenei aso ua faataunuuina.

Na faafetaia foi e le Minisita le Malo o Niu Sila ona o se foai e iai se masini fa'ata po'o se x-ray machine o le a faaogaina i le malae vaalele.

O le kamupani a le Ulia Construction sa feagai ma lea galuega o le toe faaleleia o le malae vaalele, ma o le tau aofa'i o lea galuega e tusa ma le $3 miliona tala.