MOLIA SE TAMA 46 TAUSAGA I LE UMIA O FUALAAU FAASAINA

Fuala'au fa'asaina o le aisa po'o le methamphetamine

Ata Pueina: Google Image

Ua molia nei e leoleo se tama 46 tausaga le matua o le soifua i le umia lea o fuala'au fa'asaina o le aisa po'o le methamphetamine.

I se pepa o faamatalaga na tuuina mai e le Matagaluega o Leoleo, na taua ai e faapea o le faaiuga o le vaiaso na te'a nei na faatautaia ai se osofaiga a leoleo i se fale i Motootua, ma maua ai le ua molia faatasi ai ma fualaau faasaina o le aisa. 

O soligatualafono e a'afia ai le aisa ua fa'atupulaia pea, o le mafuaaga lea ua alai ona faagasolo pea osofaiga e leoleo ina ia taofia lea tulaga.

O nisi o meatotino na maua mai i le osofaiga i Motootua e aofia ai tupe, ututau, ma nisi o masini ma telefoni feaveai.

O se faamanatu a le matagaluega i le mamalu o le atunuu e faapea o soligatulafono e aafia ai fualaau faasaina o se solitulafono matuia ma e ogaoga tele.

O loo una'ia malosi foi e leoleo soo se tasi e iai ni faamatalaga e uiga i ia ituaiga mataupu ina ia lipoti mai i le ofisa i latou ua masalomia o loo faia ia solitulafono.

E mafai e le mamalu o le atunu'u ona fesootai atu i leoleo poo le telefoni i le numera 22222.

O le tama 46-tausaga o loo i lalo pea o le vaavaaiga a leoleo se ia valaau lana mataupu i le Aso 12 o le masina nei o Iuni.