FA'AMAONIA MAI E AUAPA'AU O LO'O FA'AAUAU PEA SUESUEGA I LE MALIU AI O TU'UAU FA'ASAVALU

Komesina o Leoleo, Auapa’au Logotino Filipo

Ata Pueina: Supplied

Ua faamaonia mai e le Komesina o Leoleo ia Auapa'au Logoitino Filipo, o lo'o faagasolo pea suesuega a le matagaluega i le tausailia ai lea o lē na fa'afoeina le taavale na taia ma mafua ai le maliu o le alii talavou ia Tu'uau Fa'asavalu.

O lea fa'alavelave na tula'i mai ia Aperila o le tausaga e 2021 i Vaitele-fou, ma e o'o mai lava i le taimi nei e le'i maua lava le tagata na aveina le ta'avale na lavea ma maliu ai Tu'uau.

Na talosagaina e leoleo le fesoasoani a le mamalu o le atunu'u i le sailia ai o lea ta'avale afi ma lē sa faafoeina.

I se faatalatalanoaga a le leitio a le Eyespy ma le alii Komesina, na taua ai e Auapa'au ua silia nei ma le lua tausaga o suesueina lea mataupu ae e le'i maua lava se tali.

Peitai na ia saunoa mai e faapea, "Ua iai nei ni molimau ma faamatalaga fou e uiga i lea mataupu o lo'o auiliili e le matagaluega. 

Na agiga i luga o upega tafailagi nisi o faitioga a le mamalu o le atunu'u e fa'asaga i le matagaluega o leoleo ona o le atoa ai o le 2 tausaga o suesue pea lea mataupu ae e le'i maua lava se tali. 

“E lei tapunia lava suesuega i lea mataupu, ma sa oo lava ina matou talosaga atu i le atunuu mo ni faamatalaga e ono maua ai se faaiuga o le mataupu,” o le saunoaga lea a Auapaau.

“E auiliili ma siaki e Leoleo faamatalaga uma e tuuina mai, ma afai matou te mautinoa e lava mau ona matou faila lea o moliaga.

E lei mafai ona ia faailoa mai faamatalaga o molimau fou, ae ua ia silafia ua tu'uā'ia fa'alaua'itele e le atunu'u le alii faipule ia Lealailepule Rimoni Aiafi e faapea o ia tonu lea e iai lona fesootaiga i le ta'avale o lo'o sailia.

O lo'o fa'aauau pea suesuega e uiga i lea mataupu.