FA'AILOA E CHRISTIAN LEALI'IFANO LONA FIA TA'ALO MO LE MANU

Photo: Christian Leali’ifano

O se tasi o tama ta'alo na avea ma fesi (first-five eighth) a le au lakapi a Ausetalia o le Wallabies i nai tausaga ua mavae ia Christian Leali'ifano, ua fa'ailoa lona naunau ai lea e avea o ia ma sui o le Manu Samoa 15.

O Leali'ifano o lo'o ta'alo ai nei mo le au o le Moana Pasefika i le taamilosaga a le Supa Lakapi.

Ma i le mae'a ai o le ta'aloga a le Moana ma le au a le Fiti Drua i le vaiaso ua mavae, na taua ai e Leali'ifano e na te le toe fia ta'alo mo le au a le Wallabies a Ausetalia. 

Ae na ia fa'aalia o lo'o fia fa'aaoga lona taimi o lo'o totoe e ta'alo ai mo le Manu Samoa 15.

Na ia taua foi afai ae ia maua le avanoa e ta'alo ai mo le Manu, o le a taunu'u ai loa lana miti ua leva ona ia momo'o iai, o le avea lea o ia ma avefu'a mo lona atunu'u faapea ai ma lona aiga.

O Leali'ifano na tulaga maualuga lana ta'alo i lea ta'aloga ma le au a le Drua, e ui e le'i manuia lana taumafaiga mo le ai manumalo agai i le pou lea na manumalo ai le Drua e  47 - 46.