SAUNI NISI ILOGA I LE MUSIKA MAI I LE PASEFIKA E FAAFIAFIA I LE KONESETI O LE MOTHERLAND SAMOA
Ata Pueina: Lars Gustaf Bell/ Eyespy Radio Samoa
O le Aso Faraile o le vaiaso nei na fa'atautaia ai le fono a le vasega o tusitala ma le au faafiafia ua lautogia mo le koneseti tele o le Motherland Samoa.
O nisi iloga i le musika mai i le Pasefika ua atofa e faafiafia i lea faamoemoe o J-Boog, Bina Butta ma lona tuagane o Kennyon Brown, o le alii o Donnell Lewis, o George Fiji Veikoso, Savage, DJ Noiz, DJ Kayoz, DJ 651, Wayno, Lani Alo, HP Boyz, Lisi 4300, Tree, Tomorrow People, faapea ma nisi o faili mai i Samoa nei e iai le Pacific Love, faapea le alii o Zipso ma Mautoatasi.
Ina ua fesiligia le alii o Lani Alo i le tāua o le faaogaina o la tatou gagana e fatuina ai pese, na ia saunoa mai e tāua tele le taleni o le musika e faaolaola ai le Gagana Samoa.
"Ao amata ona ou pese mai na ou tusiina nisi o a'u fatuga i le Gagana Peretania.
"Peita'i, o le pese na ou lauiloa ai o le pese na ou usuina i le Gagana Samoa o le "Alo I Ou Faiva".
Ata Pueina: Lars Gustaf Bell/ Eyespy Radio Samoa
Na taua foi e le ali'i o Fiji Veikoso, o lea koneseti ua o se auala e faaali ai lona agaga faafetai ia Samoa ma nisi o ana fatuga na ia fiafia e faalogologo iai ao tuputupu a'e.
O lea koneseti ua faatulagaina mo le aso a taeao (Aso To'ona'i 3 o Iuni) i le malae taalo faavaomalo o le Apia Park, ma e amata faafiafiaga ile itula e 1pm i le aoauli se ia pā'ia le 10pm i le po.