ASIA E LE "MAPU MAIA" MAI I NIU SILA LE TO'OMAGA MO E UA PUAPUAGATIA
SVSG and Mapu Maia reps
Ata Pueina: Lars G Bell/ Eyespy Radio Samoa
O le Aso Lulu o le vaiaso nei na asia ai e se tasi o faalapotopotoga ua faaigoaina o le "Mapu Maia" mai i Aotearoa Niu-Sila le To'omaga mo E ua Sauaina ma Puapuagatia poo le Samoa Victim Support Group, ma tau'a'aoina iai nisi o masini faaonaponei e ai se digital camera ma se komepiuta, faapea se foai tau seleni ma nisi o meatotino e faaogaina e le fanau ua a'afia i sauaga.
Na taua e le Pule Sili o le Mapu Maia ia Pesio Ah-Honi i se faatalatalanoaga ma le leitio a le Eyespy, na ia faavaeina lea faalapotopotoga i le tausaga e 2009, ma o nisi o a latou auaunaga e aofia iai le faatalatalanoaina lea o mataupu tau ava malosi, a'afiaga o ta'aloga tau tupe (gambling addiction), a'afiaga o fualaau faasaina, faapea ai ma mataupu e pei o sauaga i totonu o aiga faapea le sosaiete.
"Ua leva ona o matou fuafua matou te fia o'o mai ma asia le to'omaga i le fa tausaga talu ai. Peitai, e le'i mafai ona fa'ataunu'uina ona o vavao o le koviti-19 i le 2019.
"Ae faafetai o lea ua maua si ia laolao matou te mafuta ai ma le au faigaluega a le to'omaga fa'apea fo'i ma le fanau i lenei aso," o le saunoaga lea a le tamaitai pule.
O le Mapu Maia o lo'o faamautu i totonu o Aukilani, Kalaeasitete, faapea ma Ueligitone.
Ae o lo'o iai le fuafuaga a le Pule Sili e faatuina nisi lala i totonu o Hastings ma Napier.
E silia ma le 30 le aufaigaluega a le mapu Maia ua iai nei, ma eo i latou uma o tagata mai i le Pasefika.
Ina ua fesiligia o ia pe aisea ua faaigoaina ai lea faalapotopotoga i le Mapu Maia, na ia taua e fa'apea o le mapu maia a faauigaina o le mapu mai lea i soo se ituaiga faafitauli.
Na faainoina e le fanau o loo i lalo o le vaavaaiga a le Samoa Victim Support nisi o faafiafiaga faaleaganuu ma pesepesega aua le maimoa silasila ma le faafofogaaga a le aufaigaluega o le Mapu Maia.
O se tasi o itu na ta'ua e Pesio e na te maofa iai o loo faatino lea e le Samoa Victim Support, o le faaofi lea o le aganu'u i totonu o ana polokalame ma aoaoga e pei ona vaaia i le aso.