SILIA MA LE 10,000 TAGATA NA MAIMOA I LE KONESETI O LE MOTHERLAND SAMOA

koneseti o le Motherland Samoa

Ata Pueina: Eyespy Radio 87.5FM / Lars Gustaf Bell

E silia ma le 10,000 tagata matamata sa mafai ona maimoa faafofoga ma silasila i le koneseti o le Motherland Samoa lea sa fa'atautaia i le Aso To'ona'i o le vaiaso na te'a nei.

E ui i le tulaga louloua ma le faaletonu o le tau sa iai i le aso o le koneseti, ae e le'i avea lea ma itu e taofia ai le fia maimoa pea o tagata i le Motherland Samoa lea sa mafai ona faafiafia ai nisi iloga i le taleni o le musika mai i le pasefika e pei o Fiji, J Boog, HP Boyz, Lisi, Savage, DJ Noiz, Kennyon Brown,

Tomorrow People, Bina Butta, Wayno, Lani Alo, DJ Tikelz, DJ 651, Donell Lewis, Mautoatasi & Matalena, Pacific Love Band, Rellek Brown, Tree, Zipso, DJ Kayoz, ma DJ Wreckah.

O lea koneseti tele sa mafai ona fa'atinoina ona o le galulue so'oso'o tau'au a le PacifiCast ma nisi o pisinisi i Samoa nei ma atunu'u mamao, faapea ai foi ma le Malo o Samoa e ala i le Pulega o Tagata Tafafao Maimoa mai Fafo (S.T.A), ma le Malo o Ausetalia fa'apea ai ma Niu Sila.

I le pepa o faamatalaga na tuuina mai e le PacifiCast na taua ai e le na ia faavaea lea faalapotopotoga ia Julius Tuigamala, o le Motherland Samoa ua avea ma auala e galulue vaavaa lua ai faigamalo, pisinisi, faapea nisi o faalapotopotoga tuma'oti e le gata o i Samoa nei ae fa'apea ai atunu'u i fafo.

Na ia momoli le faafetai i le Malo o Samoa faapea le Pulega o Tagata Tafafao Maimoa mai Fafo ona o la latou lagolago ma le galulue faatasi ua manuia ai le fa'ataunu'uina o lea koneseti i totonu o laufanua o si o tatou atunu'u.

O lo'o iai le fuafuaga o lea koneseti o le a faia i tausaga uma, ma o se tulaga o lo'o tagataga'i iai le malo o Samoa.