LOLOVAIA NISI O AFIOAGA I SALAFAI ONA O LE MAMAFA O TIMUGA

Lologa i Savaii

Ata Pueina: Facebook

Na iloga ona mafatia nisi o alalafaga i le motu tele i Salafai ona o  le tulaga louloua ma le faaletonu o le tau sa iai i le Aso Tofi o le vaiaso nei na faaleagaina ai fale ma meatotino a le toatele o lo'o alala ma nonofo ai i lea pito o le atunu'u.

E pei ona vaaia i nisi o ata na tuuina mai e le mamalu o le atunuu i luga o upega tafailagi le tatafe ai o vaitafe ua aafia ai nisi o taavale i luga o ala tele aemaise ai le tapunia ai lea o le auala aua le saogalemu lautele o nai o tatou tagata.

Na fautuaina ai e le Pulega a le tineimu i luga o upega tafailagi le utagia ai e le mamalu o le atunuu le saogalemu.

O lea tulaga ua fautaina ai e le Pulega o Tineimu le mamalu o le atunu'u ina ia fa'amuamua lo latou saogalemu a'o iai le tau i lea tulaga louloua.

O nei fautuaga mo le mamalu o le atunuu e tusa ai ma suiga o le tau i timuga mamafa ma lologa e aofia ai le siaki lelei o maota ma laoa auā le saogalemu mai vaega o tetele ai tafega.

Ae e le gata foi i lea, ia faaeteete ma alo ese mai i uaea eletise, ma ia siaki muamua meafaitino e faaaoga ai le eletise mai  po'o ua susū, ma ia alofia foi uaea eletise i luga o auala.

O loo fautuaina foi le silasila i alo ma fanau mai alavai ma vaitafe lalata ane i ono maumau ai se soifua.

Mo avetaavale ia utagia lelei le saogalemu ina ia aua le avea le taavale pe savalia foi ni vaega ua aafia i tafega.