MANUMALO MANCHESTER CITY I LE UEFA CHAMPIONS LEAGUE

Kalapu soka o le Manchester City

Ata pueina: Sky Sports

O le taimi muamua lenei i lona tala faasolopito ua manumalo ai le au soka a le Manchester City mai i Peretania i le ta'amilosaga mo kalapu soka ta'uta'ua a le lalolagi ua faaigoaina o le UEFA Champions League 2023. 

Ma ua tolu (3) ai nei taamilosaga ua manumalo ai Manchester City i le tausaga lava lenei, e aofia ai le Premier League ma le FA Cup.

Na suipi Manchester City i le Ipu o le Champions League ina ua ia faato'ilalo le au mai Italia o le Inter Milan i 'ai e 1 - 0 i le malae ta'alo o le Ataturk Olympic Stadium i totonu o Istanbul Turkey.

O le alii mai Sepania ia Rodrigo Hernández Cascante na auala mai ai le sikoa malo a Manchester City i le minute lona 68 o le ta'aloga e sue ai le siamupini o lea taamilosaga logologoa i le lalolagi.

E ui o le taimi muamua lea ua manumalo ai Manchester City i le UEFA Champions League, ae o le fa'atolu ai lea ona si'iina e le latou faiaoga ia Pep Guardiola le Ipu Autu o lea taamilosaga o se alii faiaoga.

Na faaalia e le ali'i kapeteni a le Manchester City ia Ilkat Gundogan i se faatalatalanoaga ma le BT Sport ua na o le lagona lava o le fiafia ma le fa'agae'etia na iai lana au ina ua manumalo ia Inter Milan.

"E ui na ou iloa e faigata le taaloga o le a faia ma le au a Inter Milan ona e mataina foi le latou taumafai mai i lenei tausaga, ae na matou talitonu e matou te mafaia," saunoaga lea a le kapeteni.