MALIU SE TAMAITAI FAIAOGA ONA O SE FAALAVELAVE TAU TAAVALE AFI I SALELOLOGA

O le magatolu lea o lo'o i Salelologa na tupu ai lea faalavelave (Ata Pueina: Savai'i Samoa Tourism Association)

Ua fa'amaonia mai e le Komesina Lagolago o le Matagaluega o Leoleo ia Papali'i Monalisa Tia'i-Keti i se faatalatalanoaga ma le Eyespy Radio le maliu ai lea o se tina 45 tausaga le matua o le soifua ona o se faalavelave tau taavale afi na tupu i le afioaga o Salelologa i le vaiaso na se'i mavae atu.

Na ta'ua e Papali'i e fa'apea o faamaumauga na faamauina e leoleo e uiga i lea mataupu, o lo'o ta'ua ai o le ua maliu na ia fa'afoeina le ta'avale. E fa'apea o le taimi na a'apa ai o ia i luma o le dashboard o lona sa e taofi nisi o meatotino mai i le to'ulu i lalo, ae fa'afuase'i loa ona se ese lana taavale mai i le itu auala sa tatau ona iai ma feto'ai ai loa ma le isi taavale.

O le ua maliu e mai i le afioaga o Fa'ala Palauli, ma o se tamaitai faiaoga i le A'oga Tulaga Lua a le Ekalesia a Iesu Keriso o le Au Paia o Aso e Gata ai i Vaiola.

O lea fa’alavelave tau taavale afi na tupu i Salelologa i le vaega olo’o iai moli fa’asino ala (traffic lights), ma sa iai le isi tagata i totonu o le ta’avale i le taimi na tula'i mai ai lea fa'alavelave ae e le’i afaina o ia.

Na ta'ua foi e Papali'i e leai se isi ua molia ona ua maliu le sa fa’afoeina le ta’avale.

Ua fa’ailoa i luga o upega tafa’ilagi fa'amaisega ma lagona fa’anoanoa o aiga ma fanau sa a’oa’ina e lenei tina, ona o le motusia fa’afuase’i o le mafutaga talu ai lea fa'alavelave.

O lo'o fautuaina e le Matāgaluega o Leoleo i latou olo’o fa’afoeina ta’avale ina ia tautuana le saogalemû i luga o le auala tele.