FOAI E IAPANI SE VA'A LEOLEO GATAIFALE $1 MILIONA MO SAMOA

Photo: Samoa Police

E $1 miliona tala le tau aofa'i o le va'a leoleo o le Tilafaiga ua foa'i e le Malo o Iapani mo Samoa aua le fesosoani ai lea i le mataituina ma le puipuiina o le gataifale ma ogasami a si o tatou atunu'u.

O le Amapasa a le Malo o Iapani le Afioga ia Senta Keisuke, na tauaaoina lea meaalofa i se sauniga fa'apitoa sa faia i le uafu i Matautu i le aoauli o le aso ananafi.

Na ta'ua e le Palemia o Samoa ia Fiame Naomi Mata'afa i lana saunoaga autu, " O se tasi lea o matati'a ua ausia e Samoa ma Iapani a'o fa'amanatu ai le 50 tausaga o so'otaga fa'alemalo i le va o atunu'u e lua.

Na fa'aalia foi le agaga faafetai a le Palemia o Samoa i le Malo o Iapani ona o le vave taunu'u mai o lea va'a leoleo, ma sa ia faafetaia foi nisi o atunu'u sa fesoasoani i le leoleoina o ogasami a Samoa a'o talia ai le taunu'u mai ai o lea va'a fou mai i le Malo o Iapani.

Na saunoa foi le Amapasa o Iapani, o lea va'a leoleo o se fesoasoani a Iapani i le mataʻituina o le gataifale a Samoa ma le faamalosia o tulafono e puipuia ai ogasami a Samoa, ma o le a faʻaleleia ai foi le puipuiga o tuaoi.

Saunoa le Komesina o Leoleo ia Auapaau Logoitino Filipo e fa’apea, e 17 mita le umi o le va’a ma e 20 maila i le itula le saoasaoa.

“E mafai ona malaga i Amerika Samoa ma toe foi mai i totonu o nai itula,” o lana faaaliga lea.

Na ia saunoa foi, o le va’a leoleo fou o le a faafaigofieina ai a latou galuega, e pei o le mata’ituina ma le leoleoina o ogasami, aemaise lava le leoleoina o le Sone Tau Tamaoaiga Fa’apitoa a Samoa po'o le Exclusive Economic Zone (EEZ).

O tulafono fa'ava-o-malo o le gataifale a Samoa e le fa'atagaina ai va'a fagota laina uumi (long-line fishing vessels) a Saina ma isi atunu'u ona fagota i le 20 maila mai i le Samoa ma o lea va'a fou ua mafai ai e leoleo ona mata'ituina ma piki mai va'a fagota fa'asolitulafono i totonu o tuaoi o le Sone Tau Tamaoaiga Fa’apitoa a Samoa.