TOALUA Ni ALII TALAVOU UA MOLIA I LE GAOIA O LE ATO A SE ULUGALII MAI I SAINA

Photo: Eyespy Radio Samoa

Ua taofia nei i lalo o le vaavaaiga a le Matagaluega o Leoleo ni alii talavou se toalua (2) o lo'o masalomia i le ave fa'agaoi ai lea o le ato a se ulugali'i mai i Saina i le afiafi o le Aso To'ona'i ua tuana'i atu.

Na saunoa mai le Komesina Lagolago o le Matagaluega o Leoleo, Falepuipui ma le Ola Toe Fuataina ia Papali'i Monalisa Tia'i-Keti, o le ulugalii Saina o lo'o a'afia i lea mataupu sa fai le laua talisuaga i se faleaiga fa'atasi ai ma se isi ulugali'i o lo'o asiasi mai foi i Samoa, ae gaoia loa le la ato e nei taulelea e toalua.

Na taua e nisi o molimau sa iai i le taimi na faatino ai e nei taulelea e toalua lea soligatulafono, e fai si vave o le gaioiga a i laua ia e toalua ua molia. E latou te le'i iloa le taimi tonu na gaoia ai e i laua nei le ato, ae faato'a iloa ina ua vaaia lea mafine Saina o lo'o tauvala'au ma tulituli atu i nei taulele'a e toalua o lo'o tamomo'e ma ave le ato.

Saunoa fo'i le Komesina Lagolago e fa'apea na logoina leoleo i lea lava aso e uiga i lea mataupu, ma sa faatino suesuega ma toe maua ai lava le ato sa tiai e nei taulelea i se nofoaga e le mamao ese ma le faleaiga.

Na te’ena fo’i e Papali'i ripoti e fa’apea, e tele ni tupe mai i fafo sa i totonu o le ato na gaoia e nei ali’i talavou e toalua.