69 LEOLEO FALEPUIPUI UA FA'AU'U MA TUSI PASI FA'APITOA

Photo: SPPCS

E 69 tamaiatai ma alii malu o le malo mai le Ofisa o Falepuipui ma le Ola Toe Fuata'ina ua fa'au'u mai i se tasi o a'oa'oga ua ta'ua o le Operational Safety Tactics Training Course.

O lea a'oa'oga sa fa'atautaia mo le 2 masina, ma sa mafai ai e i latou nei e 69 ona maua le tomai ma le agava'a e fa'atino ai galuega tau i le falepuipui mai i lea a'oa'oga.

I lana saunoaga autu i se sauniga e aloa'ia ai le ausia ai e i latou nei e 69 o nei tusipasi fa'apitoa, na taua ai e le Komesina o Leoleo Falepuipui ma le Ola Toe Fuataina ia Auapaau Logoitino Filipo, e aoga tele ia ituaiga a'oa'oga mo le fa'alauteleina o le tomai ma le agava'a a i latou o lo'o nafa ma le va'aia o i latou o lo'o nofosala i le falepuipui.

Na fa’ailoa fo'i e Auapa’au le mana’omia ai lea e le to’atele o leoleo o lo'o faigaluega i le Toese o nei a'oa'oga ina ia maua ai le agava’a i le fa’atinoina o a’oa’oga mo le saogalemu.

Na ia fa’aopoopo mai fo’i, o a’oa’oga ua faia ma a’oa’oina mo fa’amoemoega tetele ma le malamalama i le tulafono.

Na fa’ai’u le saunoaga a le Komesina o Leoleo, Falepuipui ma Toefuata’iga i le momoli lea o le fa’amalo i le aufaigaluega uma, fa'apea le fautua lea i le to’aonosefuluiva ina ia lototetele ma fa’aaloalo i le fa’atinoina o le poto ma le tomai ua maua.

O le O.S.T Training Course sa fa'atautaia e le Vaega o A'oa'oga a le SPPCS ma ose a'oa'oga ua fa'amaonia e le Pulega o Fa'ailoga Taualoa a Samoa po'o le Samoa Qualification Authority.