FOLASIA I LUMA O LE PALEMENE LE TOE FA'AFO'I O LE RESITALAINA O TA'AVALE AFI MA LAISENE AVETA'AVALE I LE PULEGA O FELAUIA'IGA I LE LAUELEELE (L.T.A)

Minisita o Leoleo ia Faualo Harry Schuster

Ata pueina: Parliament of Samoa

O se tulafono taufaaofi e toe fa’afo’i ai le matafaioi o le resitalaina, laiseneina ma le toe tu’uina atu o laisene ave ta’avale i tua i le Pulega o Felauaiga i le Laueleele, lea na folasia i luma o le Palemene i le aso Lulu o le vaiaso nei.

O le laiseneina o taavale afi, resitalaina ma le tuuina atu o laisene avetaavale o loo fa'atino e le Matagaluega o Leoleo ma Falepuipui i le taimi nei. Peitai, o loo talosagaina e le Minisita o Leoleo ia Faualo Harry Schuster se faamaoniga a le Palemene mo ia matafaioi ina ia toe tuuina atu i le Pulega o Felauaiga i le Laueleele.

I le tuuina atu o lea tulafono taufaaofi i luma o le Palemene, na taua ai e Faualo o le a faamaoti mai ai matafaioi eseese a le Pulega o Felauaiga i le Laueleele ma le Matagaluega o Leoleo.

Na ia ta’ua fo’i, o le a tumau pea le vaega o ta’avale i le Matagaluega o Leoleo ae toe fa’afo’i le lesitalaina o ta’avale i le Pulega o Fanua ma Felauaiga.

O le Tulafono o Ta'avale Afi poo le Road Traffic Act 2009 na toe teuteu i le 2019, ma tu'uina atu ai i Leoleo le matafaioi e tu'uina atu laisene ta'avale ma laisene ave ta'avale.

O le a toe suia atoa le faagasologa pe afai ae talia e le palemene le teuteuga o le tulafono.