SAUNIA VAELEI VON DINCKLAGE MO LE MISS SAMOA 2023

VAELEI VON DINCKLAGE (Ata Pueina: Lars Gustaf Bell)

Ua sauni se tasi o tamaitai sa avea muamua ma tusitala ma tagata faasalalau ia Vaelei Von Dincklage, e tauvā ai i le sailiga tausala o le Miss Samoa mo lenei tausaga.

O Vaelei ua 25 nei tausaga o lona soifua mai i afioaga o Luatuanu'u, Falealupo, Vaiusu, Lotofaga, Amaile, ma Nofoali'i.

O ia o se tamaitai na tulaga muamua/sili i le matātā fa'atusitala ma le fa'asalalau (Media & Journalism) a le Iunivestē Aoao o Samoa i le tausaga e 2020.

Na maua le avanoa e galue ai o ia i le Tagata Pasefika ma le Sunpix Productions i Niu Sila ina ua maua lana Tipiloma i lea matātā.

Sa galue foi o ia o se tusitala e ripotia ta'aloga i le fale nusipepa o le Samoa Observer.

Ae o le tausaga nei, ua avea ai o ia o se tasi o sui tauvā e toasefulu (10) o le Miss Samoa, ma o lo'o lagolagoina o ia e le J.A.D.S Samoa.

Na ia ta'ua i se fa'atalatalanoaga ma le leitio a le Eyespy i le amataga o le vaiaso nei, e ui e fou ia te ia le auai ai i lea ituaiga faamoemoe, ae ua avea lea itu o se lu'itau i lona tagata.

"O se avanoa tāua lenei e fa'ailoa ai tomai ma agava'a o lo'o i lo'u nei tagata fa'atauva'a, ia avea ai a'u o se fa'ataitaiga lelei i tamaitai uma o si o'u atunu'u pele o Samoa.

O lo'o ia faʻamoemoe e mafai ona ia faʻamalosia nisi tamaitai talavou ina ia ausia o latou moemitiga ma moomooga o loo iai.

Na momoli le faafetai a Vaelei i lona aunt o Luasalafai Ah Tong mo le una'ia o ia e auai i le tauvaga o lenei tausaga.

Na ia faafetaia foi le J.A.D.S. Samoa o lo'o fa'afoeina e le tamaitai o Jessie Ah Tong mo le lagolagoina o ia.

Ae fa'apea ai foi lona aiga aemaise ana uo.

O Vaelei na aotauina i le Christ the King Pre-school, St Mary’s Primary School i Savalalo, ma St Mary’s College i Vaimoso fa'apea ai ma le Iuniveste Aoao o Samoa i Lepapaigalagala.