TAOFIA E LEOLEO LE ALI'I O SEMISI ALIIMATAFITAFI

Ua i lalo nei o le va'ava'aiga a le Matagalauega o Leoleo le ali'i o Semisi Aliimatafitafi, o lo'o masalomia i lona fa'ao'o lea o le oti i se tane mai i le afioaga o Taufusi i le Aso Lulu o le vaiaso ua mavae atu nei.

Na fa'amaonia mai e le Sui Komesina o Leoleo ia Lafaitele Herbert Aati e fa'apea, o le aoauli o lea Aso Lulu i le ta o le 2pm-3pm na alia'e mai ai lea mataupu i totonu o Leone.

O le Aso Gafua o le vaiaso nei na tu'uina ai i luga o upega tafailagi e leoleo se "wanted poster" o le ali'i o Semisi, ina ua fiu e saili e le maua lea alii i le vaiaso ua tuana'i atu.

Ae o le aoauli o le Aso Lua o le vaiaso nei na taofia ai e leoleo i Tufuiopa se ta'avale o lo'o malaga atu ai le ali'i o Semisi.

"Na logoina le ofisa e nisi o le mamalu o le atunu'u na va'aia Semisi o fa'afoeina mai lea ta'avale," o le saunoaga lea a Lafaitele.

O le Semisi Aliimatafitafi e mai i afioaga o Matautu, Faleasi'u ma Apia, ma e iai nisi o soligatulafono na molia muamua ai o ia.

Na fa'afetaia e le Sui Komesina le mamalu o le atunu'u ona o le fesoasoani atu i le tausailia o Semisi.