LEAI SE SUI O LE MANU SAMOA O MANU'A I LE MAE'A AI O LE TA'ALOGA MA AIALANI

(Ata Pueina: Manu Samoa Facebook)

Ua fa'ailoa mai e le Faiaoga Ulu o le 'au a le atunu'u ia Vaovasamanaia Seilala Mapusua, o lo'o soifua maloloina uma sui o le Manu Samoa.

Na ia taua e leai se isi o lana 'au na lavea pe manu'a mai i le ta'aloga ma Aialani sa fa'atautaia i le amataga o lenei vaiaso, lea na faiaina ai le Manu i 'ai e 13 i le 17 a Aialani.

O le Manu Samoa ua taunu'u nei i laufanua  i Farani, ma na fa'ailoa mai e Vaovasamanaia o lo'o fa'agasolo tapenaga ma toleniga masani a lana 'au aua le Ipu o le Lalolagi i lenei masina.

"E ui i le pulu ma le finau o le ta'aloga ma Aialani, ae fa'afetai e leai se isi na tuga se manu'a i le mae'a ai o lea ta'aloga," saunoa Vaovasamanaia.

Na tali Vaovasamanaia i ni isi o atugaluga a le mamalu o le atunu'u e fa'apea e tatau ona faia se suiga i le laina pito i tua (backs) a le Manu.

Na ia ta'ua, "Ua ou talitonu e le toe moomia ona faia se suiga i le laina pito i tua ua iai nei, ma o le a mataitu pea po'o a nisi tulaga e tatau ona fa'aleleia.

“Oute iloa pau le tulaga o loo iai le avanoa mo le atili fa'aleleia o le lava o le manava (fitness)."

O Samoa o lo'o i le "Pulu D" fa'atasi ma Argentina, Egelani, Iapani, ma Chile.

O le Aso Faraile 17 o Setema le ta'aloga muamua a le Manu Samoa i le Ipu o le Lalolagi, lea o le a feto'ai ai ma le 'au a Chile mai i Amerika i Saute i le ta o le 2 i le vaveao.

O le Aso Toonai 23 o Setema i le ta o le 4 i le vaveao, o le a faia ai le ta'aloga lona lua a le Manu ma Argentina, ae o le Aso Faraile 29 o Setema i le ta o le 8 i le taeao le ta'aloga lona tolu ma Iapani.

O le ta'aloga mulimuli i le pulu a le Manu o le a la ta'a'alo ai ma Egelani i le Aso Sa 8 o Oketopa i le 4:45am.