FA’ATINO LE ASO FAALEAGANU'U MA LE "OPEN DAY" A LE IUNIVESTE AOAO O SAMOA

ASO FAALEAGANU'U MA LE "OPEN DAY" A LE IUNIVESTE AOAO O SAMOA (Ata Pueina: Lars Gustaf Bell)

O le Aso Faraile 1 o Setema na fa'atautaia ai e le Iunivesete Aoao o Samoa, le latou aso fa'aleaganu'u fa'apea ai ma le latou polokalame fa'apitoa o le Open Day o lenei tausaga. 

E silia ma le 1000 le aofaiga o tama ma teine aoga o lo'o i le Tausaga 13 mai i Kolisi e 26 i totonu o Samoa nei na auai i lea fa'amoemoe fa'aletausaga a le Iunivesete.

Na fa'atino e le Iunivesete nisi o tauvaga mo le fanau sa maua ai le avanoa e manumalo ai i ni fa'ailoga, na saunia e le kamupani o loo avea ma lagolago autu, le Tisaan Graphic Designs i Alafua.

O le auga ma le fa'amoemoe o ia polokalme e pei ona taua e le Sui Ao o le Iunivesete ia Professor Tuifuisa'a Patila Malua Amosa, o le fesoasoani lea i fanau aoga i a latou fa'aiuga fai i le mataupu e tauave i le tausaga fou.

 " E sautualua, muamua e mo le logoina o tamaiti o le Tausaga 13 e uiga i tulaga uma e manaʻomia mo le ulufale ai i la tatou polokalame Faavae, fa'apea le TVET mo le 2024; ma lona lua, ia fa’aalia la tatou aganu’u e ala i pese fa’aleaganu’u eseese ma siva Samoa,” o lana saunoaga lea.

O se tasi o vaega fa'aopoopo o le polokalame i lenei tausaga, o le auai ai lea o sui tauva e toasefulu (10) o le sailiga tausala a Samoa 2023, fa'apea ai ma le o lo'o avea ma tausala o Samoa i le taimi nei ia Haylani Kuruppu.

Na taua e se tasi o fanau aoga o loo i le Vasega 13 a le Kolisi o Sagato Iosefo ia Nicky Leuta, "E aoga tele lenei aso e fa'amautinoa ai i matou i le matata poo le polokalame e tauave i le tausaga fou.

"E ese foi le matagofie o lea polokalame a le N.U.S," o le saunoaga lea a Tamati Kolio mai i le Kolisi o Aleipata. "E aoga ona o lea ua ou iloa ai le tele o filifiliga e mafai ona ou tofi mai ai la'u matata e sikaki i le tausaga fou.