LĒ MANUIA TAUMAFAIGA A LE 'AU SOKA A SAMOA MO SONA AVANOA I LE OLIMIPEKA
(Ata Pueina: FijiVillage)
Ua lē i'u manuia taumafaiga a le 'au soka fa'avā-o-malo a Samoa mo sona avanoa e 'auai ai i Taaloga Olimipeka o le tausaga fou, ina ua faia'ina i le aso ananafi ia Vanuatu i 'ai e 1-3, i le ta'amilosaga o le OFC Olympic Qualifier sa faia i Aukilani Niu-Sila.
Na ta'ua e le Faiaoga Ulu a Samoa ia Matt Malcot, e ui ina lē manuia taumafaiga a lana 'au mo le Olimipeka i le tausaga a sau, ae e iai ni itu lelei sa mafai ona ausia e lana 'au mai i lea ta'amilosaga.
"E fa'anoanoa le agaga ona ua lē mafai ona maua se avanoa a Samoa mo le Olimipeka. Ae e ui i lea, e lagona lava le mitamita i le tulaga maualuga sa fa'atinoina ai le ta'aloga e nei toa o le atunu'u.
"O le game plan sa iai mo le ta'aloga ma Vanuatu o le taofiofi lea o le polo. Na matou faia lea tulaga mo le 15 i le 20 minute o le ta'aloga.
"Peita'i na matou fa'atamala ma i'u ina maua ai e Vanuatu le polo ma maua ai a latou sikoa.
"E fai si laiti o tausaga o i latou o lo'o i totonu o le 'au, e toafa ea pe toalima i latou e 17-tausaga, fa'apea ai ma i latou e 18 ma le 19-tausaga le matutua. Ma o le a taumafai pea e atia'e le latou taleni aua le lumana'i.
I se ripoti fa'atatau i le ta'aloga ma Vanuatu, na maoa'e le osofa'i a Samoa i le amataga ina ua muamua tau ona 'ai i le ulua'i sikoa o le ta'aloga mai i le ali'i o Juan Gobbi i le minute lona 16.
Ae e le'i tu'umāmāina e Vanuatu ina ua maua le latou sikoa i nai minute talu ona mae'a sikoa Samoa mai i le ali'i o Ronn Tasarur.
Na toeitiiti lava a toe maua le isi sikoa a Samoa mai i lana kapeteni ia Kyah Cahill, ae e le'i manuia.
Na maua le sala a Vanuatu ma sikoa ai le ali'i o Joe Moses, ma sili ai loa 'ai o Vanuatu e 2-1.
O le sikoa lona tolu a Vanuatu na maua mai ia Joe Moses.
Sa taumafai Samoa e tuli 'ai o Vanuatu, 'ae e le'i fa'avaivai ai le goalkeeper a Vanuatu ia Massing Kalotong na mata'ina lana puipuiga o le latou pou sikoa.
O le amataga o le afa lona lua na toeitiiti lava a toe sikoa Samoa mai i le ali'i o Greg Siamoa, ae na sefe e Kalotong.
Na taumafai fo'i Luke Salisbury mo se isi sikoa a Samoa, ae na toe sefe fo'i e Kalotong.