SUITULAGA RAY NIUIA IA LUTERU TOLAI

Ray Niuia (Ata Pueina: Manu Samoa)

Ua auai atu nei Ray Niuia i le au a le Manu Samoa o lo'o fa'amautu i le taimi nei i totonu o Montpellier i Farani, e suitulaga ia Luteru Tolai sa fa'amanu'alia lona tuli mai i le ta'aloga ma Chile i le amataga o lenei vaiaso.

Na maua le avanoa e faatalanoa ai le taitai malaga ia Su’a Hesed Ieremia mo se ripoti, i le tulaga ua iai nei le au a le atunu'u talu ona mae'a mai lana ulua'i ta'aloga.

"Fa'afetai tele Samoa mo lau tapua'iga. O lo'o manuia uma le au sei vagana ai le tatou hooker ia Luteru Tolai ua mautinoa e le toe ta'alo o ia i se ta'aloga o le Ipu o le Lalolagi o lo'o totoe ona e fai si tuga o lona manu'aga. 

"Ua toe foi atu o ia e mafuta ma si ona aiga o loo aumau i Niu Sila, ae o le susuga ia Ray Niuia mai le Moana Pasifika lea ua tofia e sui ia Luteru," o le saunoaga lea a Su'a.

O Ray Niua o lana Ipu o le Lalolagi lona lua lenei ua ia auai ai, e pei ona ia ta'alo ai fo'i mo le Manu Samoa i le Ipu o le Lalolagi i le tausaga  e 2019. 

O le ta'aloga o le a soso'o ai a le Manu Samoa o le a feto'ai ai ma Argentina i le ta o le 4:45 o le vaveao o le Aso To'ona'i nei i le malae ta'alo o le Saint Etienne.

 Ma o le aso taeao o le a fa'ailoa aloa'ia mai ai e Vaovasamanaia lana aufilifilia mo le ta'aloga o loma nei ma le aulakapi malosi mai Amerika i Saute.