LIMA SOPOAGA: TOE FA'AFO'I MAI LA'U TI FA'AMOLEMOLE

Ata Pueina: Photograph: Dan Sheridan/INPHO/Shutterstock

O lo'o mafatia Lima Sopoaga i le leiloa ai o lana ti/tee sa fa'aoga e fa'atu ai le polo mo le kikiina, ina ua mae'a le ta'aloga muamua a le Manu Samoa ma le au a Chile i le aso ananafi.

Na taua e Sopoaga, o lea ti e na te faapelepele iai ona na ia amata fa'aogaina mai lava o laititi fa'atoa 14 ona tausaga.

O le taimi mulimuli na fa'aoga ai e Sopoaga lana ti ae leiloa, o lana taumafaiga agai i le pou mo ni ai fa'aopoopo i minute fa'ai'u o le ta'aloga a le Manu Samoa ma Chile. 

Na fiu Sopoaga e toe saili le ti ina ua mae'a le ta'aloga ae ua nimo ma le tagata.

Na fa'atoga Sopoaga i luga o upega tafailagi po'o le Twitter e fa'apea, "Oe lea na avea la'u ti, fa'amolemole ia toe fa'afo'i mai.

"Oute avatu se taui lelei pe afai ae e toe fa'afo'i mai ia te au le ti. 

Na taua foi o Sopoaga na ia tu'ua le ti i autafa o lana vaimata (eyedrops), ae ua ia fiu e toe su'e ua leai se ti ae na o le vaimata o lo'o iai.

Na taua e le Pule o Faasalalauga a le World Rugby ia Dominic Rumbles i luga fo'i o upega tafailagi, e maua le taui lelei mo le na te toe fa'afo'i atu le ti a le ali'i Samoa ia Sopoaga.