TOATAMA'I LE LALOLAGI ONA O LE ALI'I LAUFALI O MATTHEW CARLEY
Matthew Carley (Ata Pueina: Independent UK)
A'o fa'agasolo ai le ta'amilosaga o le Ipu o le Lalolagi mo le Lakapi 2023 i totonu o Farani, ua alia'e mai foi nisi o tulaga fa'aletonu i fa'ai'uga fai a laufali e pei ona va'aia i le ta'aloga a Uelese ma Fiti i le amataga o le vaiaso nei.
O lea ta'aloga o se ta'aloga finau tele na toeitiiti lava a malolo ai Uelese pe ana le lusi i luma le polo mai i lima o le ali'i Fiti ia Semi Radradra i minute fa'ai'u o le ta'aloga.
O 'ai o le ta'aloga ina ua mae'a le taimi fa'atulagaina, Fiti 26 - Uelese 32.
Ae o le tulaga pito i sili ona toatama'i ai le toatele o le 'au maimoa e pei ona fa'aalia e le toatele i luga o upega tafailagi, o le fa'aletonu tele lea o le fa'atinoina e le ali'i laufali mai i Enelagi ia Mathew Carley o lea ta'aloga.
Mai i le minute 56 -62, e fa'afa (4) ona fa'asala Uelese i le offside ma le ta'alo leaga i le taimi o le breakdown. E leai se isi na tuli i tua pe pepa samasama o le 'au a Uelese e ui ina soso'o a latou sala, ae na o se lapataiga na tu'u iai e le ali'i laufali.
Ae i le minute 64 o le ta'aloga, na pepa samasama ai Lekima Tagitavalu ina ua ia taumafai e faapa'u le molo a Uelese i le 10 mita mai i le laina sikoa a Fiti.
O le faai'uga tonu lea ua matua'i le fiafia ai le toatele ona ua leva ona ta'alo leaga Uelese e le tulia i tua se isi ae tasi le fa'aletonu a Fiti ae tuli i tua.
Na fa'aalia le le fiafia o faiaoga fa'apea tama ta'aalo mai i soo se atunu'u ona o le fa'aletonu tele o lea tulaga sa vaaia.
Na ta'ua e Nicky Little sa avea ma fesi o le 'au a Fiti i tausaga ua mavae, "Na liusauavai Carley i le taimi na vevesi ai le ta'aloga ona ua ia fefe e toe fa'aali se isi pepa samasama.
"O le tele o Ipu o le Lalolagi ua tuana'i atu oute le fiafia lava i le tele o fa'ai'uga sese e faia e laufali ona e fa'aleaga ai le ta'aloga," o le saunoaga lea a Little.
Talosia ia aua ne'i iai se tulaga fa'apea e tula'i mai i ta'aloga a lau Manu Samoa o loo loma nei ma Chile, Argentina, Enelagi ma Iapani.