MOMOLI ALOAIA LE TAUSALA O SAMOA I LE PULEGA O TAGATA TAFAFAO MAIMOA MAI FAFO
Miss Samoa 2023-2024, Moemoana Safa'ato'a Schwenke (Ata Pueina: Lars Gustaf Bell)
O le taeao nei na momoli aloaia ai e le Onomea Productions ma le Digicel Samoa le tausala o Samoa 2023 - 2024 e feiloai ma le Pulega o Tagata Tafafao Maimoa mai Fafo e amatalia ona faatino ona tiute.
O le Miss Samoa 2023 - 2024 ia Moemoana Safa'ato'a Schwenke ua faapaleina mai i le tauvaga tausala o lenei tausaga, e 23 ona tausaga ma e sau o ia mai i Auala, Matavai, ma Safa'ato'a.
E tele le tomai o le tamaitai i tu faaleaganuu ma faafiafiaga e pei ona fesoasoani ai foi i le Matavai Pacific Cultural Arts Center, e umia e lona aiga.
Ma sa auai foi i nisi o faamoemoega tetele o le Pasefika e faaalia ai tu ma aganuu ma tausinio foi i le tauvaga ailao afi a le lalolagi ma tulaga lua ai.
O lona faamoemoe ia faamalosia atili talavou e faaaoga taleni.
O Moemoana na faauu mai le Iunivesite o Woolongong ma lona faailoga o le Bachelor of Arts in Indigenous Studies and Environmental Humanities.
Na manumalo o ia i le fa'aaliga taleni i le mataina o lana siva ailao afi, sili i le tauvaga siva Samoa, na ia maua foi le sarong pito i sili ona lalelei, tulaga muamua i le tauvaga puletasi, ma le tali pito sili ona mataina i le taliga fesili (interview).
Na saunoa Moemoana, "O le a ou tinou e faatino tiute ma matafaioi uma e patino i le tausala o Samoa. Ma oute tatalo mo la outou fesoasoani Samoa ma la outou lagolago i lo'u nei tagata fa'atauva'a.
O lona tina ia Maryjane Moe McKibbin-Schwenke na faapaleina e avea foi ma tausala o Samoa i le tausaga e 1997-1998.