Tapena Salamasina Mo Le Ipu O Le Lalolagi A Le F.I.F.A

Maria Salamasina o lo'o i le itu tauagavale.

Ata: Ridiqiulas Photography

O se tasi o tama'ita'i laufali mai i Samoa ia Maria Salamasina o le a toe aua'i atu i le Upu o le Laloalgi mo le Soka i le tausaga nei le e talimalo ai Ausetalia ma Niu Sila.

O le a tula'i mai le tama'ita'i ia Salamasina e avea ma laufali lagolago i le taamilosaga mo lenei tausaga. Sa avea fo'i o ia ma laufali lagolago i le Ipu o le Lalolagi o le Soka mo Tama'ita'i i le tausaga e 2019 lea na faia ai i Farani.

Na ta‘ua e Salamasina e na te lei faamoemoe o le a filifilia o ia e auai i lea ta'amilosaga, ona o le faama‘i o le Koviti-19 na tafoia uma ai ta'aloga i totonu o le atunu'u.

"Ioe, e ese lava le lagona na ia te aʻu ona ou te leʻi iloa o le a ou auai i lenei Ipu o le Lalolagi. Ou te leʻi iloa o le a ou i ai i lenei mea ona o le fa'ama'i o le Koviti na le mafai ai ona faia ni a matou taʻaloga, ae sa faia pea a matou toleniga i aso uma, o lea ou te manatu ai ua faamanuiaina au ona ua ou i ai i lenei Ipu a le Lalolagi."

I le tapenaga o le ta’amilosaga o lo’o loma nei, o lo’o fa’atumauina pea e Salamasina lona malosi, ma o le a malaga atu ai i Sasa’e Tutotonu.

“Mo le taimi nei o le a fa’aauau pea a matou toleniga i aso uma o le vaiaso, ua uma ona fai se tauvaga i Samoa ona fai ai lea o le semina i Qatar i le masina nei ona fa'agasolo ai lea o ta’aloga (Intercontinental) i Niu Sila i le masina fou. ,” o lana tala lea.

Sa ta’ita’ia fo’i e Salamasina le Ipu a Tama’ita’i U-20 a le FIFA i le 2022, ma le Ipu a Tama’ita’i U-17 a le FIFA i le 2018.

O le aofaʻi o laufali mo lenei taamilosaga o loo loma nei e 33 laufali autu, 55 laufali fesoasoani ma le 19 video-match-official/laufali televise o le a vaʻaia le ta'amilosaga.