Tatala Aloaia E Lauli'i Se Poloketi E Tapue Ai Le Suavai

Laulii I.W.S.A

Ata Pueina: IWSA

O le aso ananafi na fa'alauiloa aloaia ai le Laulii I.W.S, o se polokalame e pulea ai e le afio'aga le faaputu o vai fou e tapu'e ma sapalai ai le vai i le to'atele o ona tagata.

O le saunoaga autu na fofogaina e le Ulu o Laulii, Leniu Vainiu Te’o ma o le lipine na tipiina e le minisita o le M.W.C.S.D ia Leota Laki Sio.

O le tatalaga o lea faamoemoe sa auai i ai matai o le afioaga o Laulii, le Komiti o le Itumalo o Vaimauga 1, faifeau o le ekalesia, le ofisa o le I.W.S.A ma le atunuu atoa.

Ose poloketi na fa'atautaia e alaalafaga na mafai ona maua e ala i se faigapa'aga i le va o Laulii IWS, Kamupani LJ ma le Kamupani Inisinia o le China Harbour.

O ia galuega sa fa'atautaia e le Kamupani a le LJ lea e aofia ai le fausia o se vai fou fa'atasi ai ma le fa'atulagaina o se paipa fou e 1km transmission polyethylene.

O le poloketi sa fa'atupeina e le China Harbour Engineering Company ma e SAT500,000 lona tau.

O lo'o iai fo'i fuafuaga a le afio'aga o le Laulii e fa'aaoga a latou Faaputugatupe o Atina'e mo Itumalo mo isi fuafuaga tau le suavai. Ma na latou fa'afetaia le fa'alapotopotoga mo le fa'amautinoaina o mana'oga fa'apitoa a tagata o lo'o nonofo ai o lo'o fa'amuamua.

E tusa ai ma le tusigaigoa a le Ofisa o Faamaumauga i le tausaga e 2021, o le faitau aofai o Laulii IWS e 2,217 lea e 51% o alii ae 49% o tamaitai.