Si'ima'i Leatin'uu I Niu Sila

Minisita o Atina’e a le Malo o Samoa ia Leatinu’u Wayne So’oialo

Ata Pueina: Leatinu’u Wayne So’oialo Facebook

Ua ave i Niu Sila se tasi o minisita o le Malo o Samoa i le vaalele a le falemai mo togafitiga o lona fatu.

O se fonotaga fa'apitoa a le Kapeneta i le Aso Sa ua mavae na fa'amaonia ai le fa'amatu'u atu o le SAT$138,827.40 ina ia mafai ai ona momoli le Minisita o Atina’e a le Malo o Samoa ia Leatinu’u Wayne So’oialo i Niu Sila mo togafitiga fa’afuase’i.

O Leatinuu o ia foi o le Minisita mo le Matagaluega o Fesootaiga, Alamanuia ma Leipa (M.C.I.L), ma sa avea fo'i ma Sui Palemia mo se taimi le tumau ina ua malaga atu le Palemia ia Fiame Naomi Mataafa i atunuu mamao.

Sa faataotolia Leatinuu i le falema'i a Aukilani (Auckland City Hospital), ma o le falema'i pito i tele lea i totonu o Aotearoa.

I luga o upega tafailagi i le Aso Lua ua tuana'i na vaaia ai le lolofi atu o nisi fo'i o uo, aiga ma pelega a Leatinuu i le falema'i a Aukilani e asia le Minisita.

Sa vaaia fo'i i luga o le tusifoliga (Facebook account) a Leartinuu le tele o feau tusitusia mai i le mamalu o le atunuu o loo talosia lona toe fo'i mai lea i Samoa ma le manuia mai i ona togafitiga o loo feagai ai.