Faatino E Leoleo Se Aso Faapitoa Mo Fanau A Lalomanu

O le fa'ai'uga o le vaiaso ua te'a sa fa'atino ai e le Ofisa o Leoleo i le afio'aga o Lalomanu se aso fa'apitoa mo alo ma fanau a le alalafaga, ma sa fa'atino ai fo'i nisi o fa'afiafiaga ma ta'aloga, ae le gata fo'i i lea o meataumafa.

Na ta'ua e le fa'afeagaiga o le Ekalesia Fa'apotopotoga Kerisiano o Samoa (E.F.K.S) i Lalomanu, o le fa'atino ai e le Matagaluega o Leoleo o lea aso fiafia, ua fetaui lelei lea ma le ma'ea ai o aoga a le fanau mo lenei tausaga. Na ia saunoa foi o se polokalama taua tele aua le faafiafiaina lea o le fanau laiti ao iai Samoa i le vaitau o le Kerisimasi.

"Sa mafai e tamaiti ona taaalo i luga o fale momi (bouncy castles), ma sa lelei foi le tali mai a le Matagaluega e ala i le saunia lea o meataumafa mo i latou," o lana tala lea.

 Sa ta'ua e se tasi o sui o le afioaga ia Farani Peniana, e ese le mataina o lea faamoemoe sa faatautaia e le Ofisa, ma o le pou a le Ofisa o Leoleo i Lalomanu sa palotaina foi o le pou ua sili ona lelei lana faatinoina o galuega faaleoleo i lenei tausaga.

Na saunoa mai fo'i se tasi o sui o le alalafaga o Lalomanu, Pita Alo, o le faatautaia ai e le Ofisa o Leoleo o lea faamoemoe os se tulaga ua maua e fanau mai i Lalomanu le fiafia ao agai atu le atunuu i le faamanatuina o le fanau mai o le pepe o le Kerisimasi.

Na ta'ua e se tagata faipisinisi tu matafaga e lei fia faailoa lona suafa e faapea, sa lagolagoina lelei e tagata o le nuu le Ofisa o Leoleo i lenei tausaga ao iai le atunuu i vavao o le faamai o le Koviti19.. "E ese le tulai mai o le Ofisa i Lalomanu i le faatinoga o a latou galuega faapea le tausia lea o le filemu."

O le Komesina o Leoleo ia  Auapa'au Logoitino Filipo, o se tasi o taitai maualuga sa faatasi ma e na malaga atu i Lalomanu mo le aso o le alalafaga i le Aso Toonai ua te'a.