Taunu'u I Laufanua o Samoa le Alii Lakapi Lauiloa ia Joseph Suaalii

Joseph Suaalii i le Faletalimalo, Lava Hotel

Ata Pueina: Mathew Iakopo

Ua taunu'u nei i laufanua o Samoa le alii lakapi lauiloa ia Joseph Suaalii. O le sui o le Toa Samoa lea na muamua malaga mai se'i fa'aee lona suafa matai, i le masina nei.

Sa vaaia le tumutumu o uo ma āiga mamae o le alii ia Joseph Suaalii i le taeao o le Aso Gafua o lenei vaiaso i le Malae Vaalele i Faleolo, ina ua latou fa'atalia se tasi o Toa manumanu o le atunu'u.

O Joseph ua vave malaga muamua mai ina ia auai atu i le saofa'i faapitoa o si ona aiga lea e fa'aee ai ma lona suafa matai i le masina nei , ae o le Aso Lulu 27 o le masina nei ua tu'u e malaga mai ai le 'au atoa o le Toa Samoa lea na fa'atautaia ta'aloga i le Ipu o le Lalolagi Lakapi Liki 2022 lea na fai i Egelani. 

Na malaga mai o ia mai Faleolo ma aga'i atu ai le faletalimalo o le Lava Hotel ma feiloa'i aloa'ia ai ma le pule ia Leaupepe Christian Fruean. Sa faatino ni faafiafia mo le afio mai o lenei Rama fanau Samoa. 

O le vaiaso nei ua fuafuaina e faaeeina ai le suafa matai o le alii 19 tausaga ia Joseph Suaalii. O afio'aga e sau mai ai lenei alii o afioaga ia Satitoa ma Letogo. 

Sa fa'ateia le to'atele ina ua latou vaai tino ma fa'amaonia tala e faatatau i le ūmī o le alii , lea e faapea e 6 futu lona maualuga. E to'atele tagata lagolago ma e fiafia i lenei tama ta'alo ma vaaia ai loa le sagisagi fiafia ma pu'eina o latou ata ma le alii o Joseph.

O lenei alii ta'alo na amata lona taaloga polofesa muamua i le 17 o ona tausaga i le tausaga 2020. Ma i le ma'ea ai o le Ipu Lalolagi Lakapi Liki 2022 na avea ai o ia ma tagata ta'alo pito sili ona la'ititi i totonu o le tamilosaga ma le tala fa'asolopito o le Lalolagi i le lakapi liki.