Taunuu Le Malaga Mai O Le Toa Samoa

Toa Samoa

Ata Pueina: R.L.W.C

O le Aso 27 o Tesema o le a taunuu mai ai i laufanua le au lakapi liki a le atunuu le Toa Samoa lea sa mataina lana taumafaiga i lenei tausaga i le taamilosaga o le Ipu o le Lalolagi o le Lakapi Liki sa faatautaia i totonu o Peretania.

Na faailoa aloaia mai e le Iuni Lakapi Liki a Samoa (R.L.S) lea fuafuaga. O se tasi foi o tamalii o loo galue mo le R.L.S sa iai faatasi ma le au ao iai i le Ipu o le Lalolagi, Lauaki Fereti Tuilagi, na taua o loo faagasolo pea fuafuaga mo le malaga mai tama taaalo ma faiaoga o le Toa Samoa.

Ua leva ona talia e tagataanuu o Samoa poo afea o le a masii mai ai nei toa o le atunuu. Na saunoa mai le Sui Palemia ia Tuala Iosefo Ponifasio ina ua taliu mai i lana faatasi atu i le Toa Samoa i Peretania,  o loo talanoaina e le Malo o Samoa le aumai ai lea o le au i laufanu o Samoa.

Na taua foi e tuala, na ia talanoa i tama taaalo ma ia iloa ai o loo fia omai i latou i Samoa. Ma o se tala ua faafiafia ai le toatele o le mamalu o le atunuu ona o loo fia feiloai atu i nei alo Samoa sa mafai ona faateia le lalolagi ato ona o le matautia o le latou taumafaiga.

O le faaiuga o le masina na sei mavae atu na taunuu ai le au i totonu o Sini i Ausetalia, ma sa talisapaia e le toatele o tagata Samoa o loo aumau i totonu o lea atunuu. Na vaaia ai foi ni faafiafiaga, o siva, faapea le agiagia lea o fu'a i le malaevale i le taimi na taunuu ai le Toa.