Taunu'u Le Palemia O Samoa I Fiti

Palemia o Samoa, Fiamē Naomi Mata’afa

Ata Pueina: Anetone Sagaga / Eyespy Radio 87.5 FM

Ua taunu'u i Fiti le Palemia o Samoa, Fiamē Naomi Mata’afa mo le fonotaga a le Pacific Islands Forum Special Leaders Retreat.

Na tuuina atu e le Malo o Fiti se leoleo faapitoa aua le puipuiga o le saogalemu o le Palemia o Samoa, ma sa faafeiloai e le Minisita mo Tina ma Tamaitai, Tamaiti ma le Faaitiitia o le Mativa, Lynda Tabuya i le malaevaalele faavaomalo i le taulaga o Nadi i le taeao ananafi.

O loo feiloai nei Ta‘ita‘i o le Pasefika i le taimi ao fuafua ai le malo o Kiribati e toe auai i le faalapotopotoga o malo o le Pasefika i le mae‘a ai o se vevesi sa tupu muamua lea na fesiligia ai le taua o le Fono a Atumotu o le Pasefika ma le faateteleina o feeseeseaiga i le va o Amerika ma Saina i le itulagi o le Pasefika.

Ua sauni foi Ausetalia ma Niu Sila mo a latou fuafuaga faalemalo mo le tamaoaiga o atunuu ma atumotu i le lotolotoi o se gaioiga faifai malie a malo o le atumotu ina ia ogatasi ma peleni a Saina e ono afaina ai le saogalemu i le itulagi.

Na solomuli le Malo o Kiripati mai le fono faaitulagi i le ogatotonu o le 2022 ona o le tofiaina o le Failautusi Aoao a le faalapotopotoga lea na faamoemoe o Kiripati ma isi atunuu e fa o Maikoronesia o le a o'o i ai lo latou taimi pe a mavae le luasefulu tausaga.

Peita’i, e foliga mai ua toe lelei le mafutaga ina ua mae’a ona asiasi atu le Palemia o Fiti talu ai nei, Sitiveni Rabuka, o ia fo’i o le Ta’ita’ifono o le Fono a Atumotu o le Pasefika, i Kiripati i le masina na te’a nei i se taumafaiga e toe fa’aleleia sootaga.

Na ta‘ua e le ofisa o le Peresetene o Kiribati, Taneti Maamau, “Ua toe faafoʻi aloaia atu e Kiribati lana faamaoniga lelei e toe auai i le Fono a Atumotu o le Pasefika i lenei tausaga.”

O le faaiuga e toe auai Kiribati i le fono a le Pasefika "ua afua ina ua maeʻa se feiloaiga lelei, ma manuia" i le va o Maamau ma Rabuka, o le faamatalaga a Kiribati na lafoina i luga o le Facebook.

“I le taimi o le asiasiga a le setete, na tuuina atu aloaia ai foi e le Palemia [o Fiti] se faatoesega e ala i le faaalia o le sauniga masani a Fiti mo le faamagaloga,” o le tala lea.

O le Fono a Atumotu o le Pasefika, lea e aofia ai malo atumotu e 16 faapea foi ma Ausetalia ma Niu Sila, e leai ni malosiaga faapolokiki pe faatonutonu ai. E faia fonotaga a taʻitaʻi ma maua ai foi se auala mo le itulagi e tuʻuina atu se leo lotogatasi i mataupu e pei o suiga o le tau.