POPOLE LE MATAGALUEGA I TULAGA UA IAI MATA O SUEGA A FANAU : AEAU

Photo By : Anetone Sagaga / EyeSpy Radio

Tusa ai ma le saunoaga a le Pule Sili o le Matagaluega o Aoga, Taaloga ma Aganuu , ia Aeau Chris Hazelman o loo taumafai nei le latou Matagaluega ina ia fō'ia le faafitauli o le vaivai tele o le Gagana Peretania i le tusitusi ma le faitau mo fanau ā'oga. 

I se feiloa'iga a le au tusitala ma le afioga le alii Pule ia Aeau Chris Hazelman i le Aso Lulu o le vaiaso nei sa ia faailoa ai taunuuga o suega aoao o le S.S.L.C mo tausaga 13 i le tausaga ua mavae, e faapea na'o le 61% o tamaiti na pasi o latou suega , ae o loo popole le Matagaluega ona o maka sa mauaina mai i nei suega. 

Sa faamauina fo'i e le Univesite Aoao i Papaigalagala (N.U.S) ua na'o le 35 pasene o tamaiti na sueina suega na pasi mai i le mataupu o le faaperetania. Saunoa le alii pule sili faapea e faafaigata pea afai e 50 pasene mata o tamaiti aoga pea afai o le tulaga lea o loo iai o latou mataupu.

"O le ala lea o lea auiliili le Matagaluega e toe faaleleia nei faafitauli mai le aoga tulaga lua" -saunoaga lea a le alii pule ia Aeau. 

Tusa ai ma se fonotaga sa faatinoina i nai vaiaso ua tuana'i sa saunoa ai le alii pule sili e faapea o lea toe iloilo tulaga e faaleleia ai lea mataupu mo fanau ina ia ausia le tulaga lelei e mana'omia ai ona laasia leisi vasega o luga atu.

"E talia fo'i se finagalo mai matua i lenei mataupu , pe latou te taliaina nei aiaiga e faaleleia ai aoaoga o fanau" -saunoa Aeau

O loo faatinoina pea e le Matagaluega auala e faaleleia ai lenei faafitauli e ala lea i ni asiasiga a le Matagaluega i aoga o loo a'otauina ai fanau.

"O loo silasila le matagaluefga i nei asiasiga i fanua , siosiomaga o loo aotauina ai o tatou fanau" -i se saunoaga mulimuli a le alii pule sili.