FAASALA SE FAIFEAU FA'APOULIULI

Rev Pitotori Peter Naera

Ata Pueina: PHIL DOYLE/STUFF

Ua fa'amalolo nei se tasi o faifeau sa galue i totonu o Niu Sila, ona o ni uiga faapouliuli sa ia faia i se tasi o tama'itai sa ia faatautaia ma fa'apaiaina lona fa'aipoipoiga i nai masina ua tuana'i atu.

 O le suafa o lenei faifeau o Rev Pitotori Peter Naera, ma o lea aveeseina fo'i ona tulaga fa'afaifeau mai le latou Ekalesia o le Anglican Church i Aoteroa Niu Sila ( Ekalesia Egelani).

I ni pepa o faamatalaga sa tuuina i luga o upega tafailagi e le Faamasinoga(Tribunal) o le Ekalesia , sa faalia ai e faapea o le faifeau ia Naera ua loa tausaga o tautua i totonu o le latou Ekalesia ma o se tasi o faifeau sinia ua uma ona laiseneina fo'i i le faagasologa o faifeau.

I lenei fo'i pepa o faamatalaga sa faailoa ai le tele o soligatulafono sa faatinoina e le alii ia Naera , lea na a'e ai se tofa ma se filifiliga i le pulega ina ia fa'amamulu mai i ona tofiga fa'aositaulaga. E le mafai ona fa'ailoa suafa o le tamaitai lea na faia ai uiga fa'apouliuli , e tusa ai ma aiaiga ina ia puipui o ia.

“A fua i le umi o lona tautua sa iai totonu o le Ekalesia, ua leva na ia nofo silafia ma iloa lava o lona faatinoinaina o se mafutaga faalefeusuaiga ma se tamaitai o se soligatulafono matautia lea i tulaga o lona tofiga i totonu o le Ekalesia" tusa ai ma faamatalaga o le lipoti.

Na fa’atautaia fo’i e le alii faifeau ia Naera le fa’aipoipoga a le tama’ita’i o lo’o a’afia, ma lona to’alua. E le'i atoa le ono masina talu ona nonofo le ulugalii ae amatalia loa le mafutaga faapouliuli a le alii faifeau ma lenei tamaitai.

Tusa ai malipoti mai lenei faasalaga e faapea ua leva ona masani le alii faifeau ia Rev Naera ma lenei ulugalii , ma o loo nofo silafia foi le faifeau ua atoa le 20 tausaga talu ona feoa'i le ulugalii le a faapea ua iai se la alo e taotasi faatasi.

Sa faailoa e le to'alua o le tamaitai lea na aafia i se tusi faitio sa tuuina i le laulau o le Ekalesia e faapea o le la mafutaga laa atoa le 20 tausaga ae ua toe faamuta ona o uiga le talafeagai sa faia e lona to'alua ma le faifeau ia Rev Naera.

O le alii faaipoipo sa ave sona talosaga i le faamasinoga (tribunal) o le Ekalesia ina ia faasala  le alii faifeau ia Naera mai ona tofiga , lea na faagaioi ai loa le Ekalesia ina ia faia se fuafuaga i le faifeau ma faasala ai loa.