Te'ena E Edward Moliaga E Fa'asaga Ia Te Ia

Edward Fanueli

Ata Pueina: Edward Fanueli Facebook

Ua te'ena e le ali'i o Edward Fanueli moliaga e lima o lo'o fa'asaga ia te ia e aofia ai le fasioti tagata fa'amoemoeina lea sa fa'apea na ia fa'aogaina ai se la'au malosi e fa'atino ai lea faiga faasolitulafono i le tamaitai leoleo e suafa ia Mele Segiolo Lapana i le masina o Tesema i le tausaga ua tuana'i.

O lo'o tu'ua'ia sa tagatavaleina le tamaitai leoleo ia Mele Segiolo Lapana e le alii o Edward Fanueli e fa'aogaina ai se la'au malosi i le ituaiga o le pistol po'o le pulutasi lea e fa'asa ona umia e se isi i Samoa nei. 

O le alii loia ia Leiataualesa Jerry Brunt o loo tulai mo Fanueli ma na ia fa'ailoa i luma o le Fa'amasinoga Maualuga le te'ena ai lea e Fanueli o moliaga uma e lima o lo'o fa'asaga ia te ia.

O Fanueli sa avea muamua ma ali'i Malu o le Malo, ae na fa'amavae o ia ina ua fa'agasolo suesuega faalotoifale e le Matagaluega i nisi sa masalomia o lo'o iai latou pi'itaga i fuala'au faasaina i totonu o le Matagluega o Leoleo.

O moliaga e lima o lo'o tu'ua'ia ai Fanueli e aofia ai le fasioti tagata pa'ivalea, fasioti tagata fa'amoemoeina, fa'ao'olima tūgā, umia o se a’upega mata'utia  ma le umia lea o se a’upega e le fa'atagaina.

Sa te'ena e le itu a Leoleo le talosaga a le ali'i loia ia Leiataualesa mo se avanoa e tatala ai i tua Fanueli e talia ai lona fa'amasinoga.

Na tolopoina lea mataupu e le ali'i fa'amasino ia Fepuleai Ameperosa Roma mo le Aso 28 o Aokuso 2023 e suesueina ai mau a le itu a leoleo e tali atu ai le teena o Fanueli o ona moliaga.

Ae ua faatulaga foi le faamasinoga mo le aso 15 o le masina nei mo le suesueina lea o le talosaga a Edward Fanueli, e tauala mai lana loia ina ia tatala o ia i tua e talia ai le aso o le faamasinoga.

O le tamaitai leoleo ia Mele na fa'atei'a ai le atunu'u atoa ina ua tula'i mai lea mataupu i le vaiaso tonu na fa'amanatuina ai le Kerisimasi i le tausaga ua mavae.