Toalua Samoa O Le A Ta’aalo I Le Super Bowl

Jordan Mailata Ma Juju Smith Schuster.

Ata Pueina: Facebook

E toalua ni Alo o le atunu'u o loo taaalo mo le au a le Philadelphia Eagles ma le Kansas City Chiefs lea o le a fetoai mo le suegasiamupini o le Ta'amilosaga o le National Football League (N.F.L) ua faaigoaina o le Super Bowl.

O Jordan Mailata mai i le au a le Philadelphia Eagles ma Juju Smith-Schuster mai i le Kansas City Chiefs o ni taulele'a e iai o la tupuaga Samoa ma Amerika Samoa.

O Lafoga Jordan Mailata sa ola I Ausetalia ma sa taalo faapolofesa o ia mo le au o le Canterbury-Bankstown Bulldogs mo i latou e i lalo o le 18 tausaga le matutua.

Na ia taalo foi mo le au a Tama e I lalo o le 20 tausaga le matutua a le South Sydney Rabbitohs. 

Na auai o ia i totonu ole ta'amilosaga lakapi Amerika (N.F.L) ina ua avea o ia ma tama taalo filifilia lona 233 i le ta'amilosaga Lona 7 o le lisi poo le draft   a le N.F.L.

Na ia taua i nisi o fa'asalalauga i luga o upega tafailagi e faapea ua ia lava tapena mo le taaloga o loo loma.

"O se lu'i i lo'u nei tagata faamatalaga a le toatele na lafo mai e faapea ou te le mafaia ona ausia lea tulaga maualuga,"

"Ao matou taaalo ai ma le San Francisco 49ers I le vaiaso ua te'a, na ou teuloto tala faifai a tagata faimai e faiaina le matou au ona ole 49ers e malosi lana puipuiga (defence) ma o le puipuiga numera tasi foi lea o le N.F.L."

Na ia taua foi, o le taaloga o loo loma nei ma le Kansas City Chiefs e lē o se taaloga faigofie, ae na ia saunoa e lē o tu'umāmā e lana au tapenaga mo lea taaloga ma o le a tuu uma iai le selau pasene o Lona malosi. O Juju Smith-Schuster e afa-Samoa afa-Aferika Amerika.

O ia o se tasi o tama taalo iloga I le N.F.L ma e tele matāti'a a le N.F.L o loo ia umia e pei o le avea ai lea o ia ma tagata aupito sili ona laititi ua ausiana le 2,500 iata (yards) na ia sapoina ai le polo.

Na saunoa Juju i se faatalatalanoaga ma le N.F.L News ina ua fesiligia sona manatu I le taaloga o le a faatautaia ma le Philadelphia Eagles, na ia taua ai o loo tuu uma iai lona malosi i tapenaga ma toleniga ona o le Eagles o se au faigata.

Ua faasefulu ai nei ona taaalo le Chiefs ma le Eagles I le Super Bowl ma o loo silia le Chiefs e 5 ana manumalo I le 4 a le Eagles. O le Super Bowl lona 57 o le a faia I le Aso Gafua o le vaiaso fou (Aso Sā i Amerika).