"O LO'O FAATALI LE M.A.F I SE TALA MAI AMERIKA SAMOA" : LAAULI
Ata Pueina : Edwin Tan | Credit: Getty Images
Saunoa le Minisita o Fa'ato'aga ma Faigafaiva le Afioga ia Laaulialemalietoa Polataivao Schmidt e le'i taunuu mai se faamatalaga mai Amerika Samoa e fa'atatau lea i ni oloa(fuamoa) ua fa'aleagaina (spoiled eggs).
Sa faamaonia e le alii Minisita sa faatinoina se fonotaga i totonu lava o Amerika Samoa e faatatau lea i lea mataupu , ae lei taunuu mai lava se fa'amatalaga i le Matagaluega o Faatoaga ma Faigafaiva iinei Samoa.
E tusa ai ma lipoti a le au tusitala i Amerika Samoa e faapea na taofia e le latou Matagaluega o Taumafa nei oloa i le fa'aiuga o le masina o Ianuari ona e faapea ua fa'atama'ia pe fa'alēaogaina fo'i. (Contaminated Eggs).
E tusa ai ma lipoti o se tasi o leitio faasalalau iinei Samoa, lea sa tali mai ai le alii Minisita ia Laaulialemalietoa e faapea o lo'o taga'i nei le latou Matagaluega i lenei mataupu ma o lo'o faia pea su'esu'ega pe faamaonia tala ua feavea'i nei.
"Ua tuuina nei le mataupu i le Pule Sili (CEO) ina ia toe taga'i toto'a i lenei mataupu." tusa ai ma le saunoaga a Lauuli.
O le fono lea sa faapea ona faatinoina i Amerika Samoa , na talatalanoaina ai e faapea i le sa'o o ni faamatalaga na faasalalauina e le lautele o le atunuu. I se tusitusiga mai Mamea e faapea o nei tala sa feavea'i e leai sona fa'avae (fake news).
O lenei tustusiga sa saunoa ai le Konesula a Samoa i Pago Pago le Afioga ia Fata Kaio e faapea sa ia faafesootai i le Sui Faatonu Aoao mo se fautuaga , ae tali mai le Sui Faatonu e pepelo faamatalaga ma lipoti e faatatau i lenei mataupu.
Saunoa le Afioga ia Fata Kaio e faapea e leai se kiliva oloa na taofia e le Matagaluega o Taumafa , na faasafua lava i tua i o latou tagata faatau (retail) masani i le faaiuga o le masina ua mavae. O loo nofo silafia le Ofisa o le D.O.A i Amerika Samoa i le taofia lea o le kiliva a le Sunshine Farm ona o ni tulaga e fia faaleleia, e ala i le mao'ae o oka sa tuuina atu ai i le ma'ea ai o le vaitaimi o le fa'ama'i oti o le Koviti 19.