To'atolu Sui O Le Manu Samoa ua tofia i le "Dream Team" A Le Lalolagi

Va’a Apelu Maliko

Ata Pueina: Getty Image

I le mae'a ai o le taamilosaga mulimuli a le World Sevens Series mo lenei tausaga i Cape Town i Aferika i Saute lea na suipi ai le Manu Samoa ina ua manumalo i le au malosi a Niu Sila i le suegasiamupini, e toatolu sui o le Manu Samoa ua filifilia i totonu o le au o le taamilosaga poo le "Dream Team".

O le sui kapiteni a Samoa ia Vaa Apelu Maliko, faapea Vaa Afa Su'a ma Fa'afo'i Falaniko na tofia i totonu o le "dream team" ona o le mataina ma le maualuga o le tulaga sa iai le latou taumafai i le vae i Cape Town. 

O Maliko sa i totonu foi o le "dream team" o le taamilosaga lea sa faatautaia i Dubai i nai vaiaso ua tuana'i, a'o lea ua toe tofia fo'i i le mae'a ai o lea taamilosaga sa faia i le faaiuga o le vaiaso ua te'a.

O ia o se sui mai i le au a le Tepatasi mai Aleipata, ma sa sikoa foi o ia i le suegasiamupini ma Niu Sila lea na manumalo ai i le 12-7 i le mae'a ai o lea ta'aloga faigata.

O le alii o Vaovasa Afa Su’a le na filifilia foi i totonu o le "dream team", e mai i afioaga o Salelavalu, Salelologa ma Fa'ala Palauli i Savaiii o loo taulamua i le faia lea o faata’ita’iga lelei mo le 'au i luga o le malae.

Tuna Tuitama

Ata Pueina: Getty Image

Sa ta'alo lakapi ta’ito’a 7 ma sa avea ma Kapeteni mo Tama Uli i le tele o tausaga, ae peitai e lei maua lava se avanoa i totonu o le ‘au taitoafitu a le atunuu.

Ae o le amatalia ai o le nofoaiga a Muliagatele Brian Lima, sa maua ai loa le avanoa na te taalo ai mo le Manu. O Vaa Afa Su'a ua 31 o ona tausaga, ma ose tasi foi o ta'ita'i mo le 'au lea e tele o ona sui e i lalo o le 30 tausaga le matutua.

Faafoi Falaniko

Ata Pueina: Getty Image

O Fa'afo'i Falaniko osa mata'ina foi lana ta'alo i taaloga uma sa faia a le Manu Samoa taitoafitu. O ia foi na kikiina le sala agai i le pou lea na manumalo ai Samoa ia Aferika i Saute i le la ta'aloga semifinal 10-7.

O le a toe taliu mai le Manu Samoa taitoafitu i Samoa mo se malologa ma toe sauni ai mo le vae lona 4 o le HSBC World Series lea ua faatulaga mo le aso 22 o Ianuari i Hamilton, Niu Sila 2023. E toe taliu mai le ‘au i Samoa i le itula e 7 i le afiafi o le Aso Lulu o le vaiaso nei.