Maitauina E Le Faamasinoga Maualuga A Samoa Le Agavaa O Leoleo I Le Taulimaina O Molimau
Ata Pueina: Eyespy Radio
Ua tele ni faaseā a le atunuu e fa'asaga i le taulimaina e leoleo o molimau mo mataupu tau faamasinoga, ma o le mea fou ua matauina e le Faamasinoga maualuga o Samoa, o le Faamasinoga o Talosaga lea na faamamafaina lea tulaga i le latou faaiuga tusitusia i le talosaga a le tagata fasioti tagata toe solitulafono ia Kolani Junior Lam.
O le Faamasinoga o Talosaga e aofia ai faamasino sinia e to’a 3 mai fafo ma o se faamasino o le Faamasinoga Maualuga na taitaia le talosaga a Kolani faasaga i lona nofosala i le olaga atoa i le masina na te’a nei ma le faaiuga atoa na tatala i le vaiaso na te’a nei.
Na taua e Faamasino mai molimau a le faamasinoga e le mafai e leoleo ona tuuina atu ni mau taua i le faamasinoga aemaise o se ata na pueina e leoleo i le aso 21 Oketopa 2018 o le manu’a o Kolani.
Na latou ta’ua na manu’a le ua apili (Kolani) i le taimi na ia faia ai se faamatalaga i leoleo ma na pueina ai ata i lena taimi. Peita'i, e le'i mafai e leoleo ona maua ata i le taimi o le fa'amasinoga.
Na taua foi e le Faamasinoga le tele o fegalegaleaiga i le va o le ua talosaga ma leoleo i aso na sosoo ai ma le faalavelave ae “e foliga mai e le o teuina faamaumauga”.
“E le mafai ona matou faailoaina se faailoga tagata i lē ua talosaga e faatatau i faamaumauga faatapulaa o loo tausia e leoleo,” o le faamatalaga lea a le Faamasinoga o Talosaga.
Sa iai fo’i fa’amatalaga i fa’amaumauga molimau a le ua tagi e le’i mafai e leoleo ona fa’ailoa i le fa’amasinoga.
“Matou te alolofa i lē ua tagi e uiga i le tausiaina o faamaumauga a leoleo,” o le faaaliga lea a le Faamasinoga o Talosaga.
A'o le'i o'o i fa'aiuga a le Faamasinoga o Talosaga, sa iai isi mataupu na fa'ate'aina e le Fa'amasinoga Maualuga ma le Fa'amasinoga Fa'aitumalo ona o tulaga fa'apenei o leoleo e le'i faia ni mau i totonu o le Fa'amasinoga.
Na laga e le Eyespy Radio lea mataupu i le Sui Komesina o Leoleo, Papalii Monalisa Keti o loo naunau e faitau le faaiuga a le Faamasinoga o Talosaga Apili a o lei faia se faamatalaga.