Sauni Le Lakapi Liki Samoa E Faia Se Sailiga Seleni Mo Le Malaga Mai O Le Toa Samoa
Ata : NRL Samoa
O lo’o talosaga atu le Lakapi Liki Samoa i le atunu’u mo se tupe mo le malaga a le Toa Samoa i le fa’aiuga o le masina nei.
O lea tulaga na fa’aalia e le Peresetene o le Lakapi Liki Samoa Su’a Fa’afouina Su’a i se fonotaga ma tusitala i le afiafi o le Aso Lulu.
Faaalia e Su‘a, o le faaiuga o le vaiaso nei o le a faia lea faamoemoe i luga o televise faapea foi le leitiofoni mo Upolu ma le isi i Savai‘i e saili ai se tupe mo le malaga a le Toa Samoa i Samoa lea ua faatulaga i le aso 27 o Tesema.
I lona ta’ua ai o lea tulaga, na fa’amaonia mai ai e Su’a, o le a tele fo’i le sao a le Malo e fesoasoani ai i le toe fa’afo’i mai o ia fo'i toa o le atunu’u.
Peita’i, e le’i mafai ona ia fa’ailoaina pe fia se tupe o le a foa’i atu e le malo e fesoasoani ai i le Lakapi Liki Samoa i le talimalo ma le aumaia o tama.
“O le a fa’aalia mea uma i le taimi e tatau ai,” o le fa’aaliga lea a Su’a.
E ui na ta’ua e Su’a e le o i ai se latou tupe fa’atatau e fa’aputuina mo le malaga toe fo’i mai, ae sa ia taua fo’i o le tau o malaga a tama ma a latou paga o le latou fa’amuamua lea.
E tusa ma le $1.2 miliona tala le aofa’i e mana’omia e totogi ai mea uma e pei ona saunoa Su’a, mai tupe alu i femalagaiga ma mea e nonofo ai.
Ina ua fesiligia Su’a i le polokalame o le malaga a le 'au ma nofo ai i Samoa, na taua ai e Su’a o lo’o tau fa’amautu fa’amatalaga o le latou polokalame.
Peita’i, sa ia fa’ailoa fa’apu’upu’u le fa’amoemoe e taunu’u tama nei i le malae va’alele i le po o le Aso Lua (27 o Tesema) ona toe feiloa’i ai lea ma le Malo i se aso mulimuli ane.
O le solo autu poo le feiloaiga ma le mamalu o le atunuu e mafai ona faia i le aso 29 o Tesema i le Apia Park Stadium.
“Ae e foliga mai o le a suia lea tulaga e fuafua lava i le fa’atulagaina o tama pe a taunu’u mai, o le a vave fa’amae’a mea uma”.
Saunoa Su’a e fa’apea, o le taimi muamua lenei ua latou faatino ai i le leitiofoni ma le televisefoni e saili ai se tupe mo le Toa Samoa.