Tulaga Lua Samoa I Le Taamilosaga Taitoafitu A Aoga A Le Lalolagi
Ata Pueina: Lakapi Samoa
Ua tulaga lua nei le au a le Tama Samoa i le mae'a ai o le taamilosaga taitoafitu mo fanau e i lalo o le 18 tausaga le matutua lea ua faaigoaina o le "World School Sevens" sa faatautaia i Pakuranga i totonu o Niu Sila i le faaiuga o le vaiaso na sei mavae.
O le 'au a le Tama Samoa sa aofia ai i totonu nisi o alo o le atunuu o loo a'otauina i aoga maualuluga i Samoa nei e aofia ai le Kolisi o Pesega, Kolisi o Samoa, Kolisi a Aleipata, Kolisi o Palauli ma le Kolisi o Nu'uasala. E toalua sui o le au sa tofia mai i totonu o Niu Sila, ma e aooga uma i laua i le aoga a le Mt. Albert Grammar.
O le aso muamua o le taamilosaga sa vaaia ai le malosi tele o le au Samoa lea na o latou faatoilaloina ai le au a Kanata 41-19, Niu Sila Fiti 31-19, ma le au a le Niu Sila Warriors 22-14.
O le aso lona lua o le taamilosaga na toe vaaia ai foi le maualuga tele o le faatinoga e alo ma tamafanau a Samoa o le taaloga ina ua o latou suipi ia Niue i le quarterfinals 50-5. I le semi na taaalo ai Samoa ma le au a le Asia Dragons, o se taaloga finau tele i le afa muamua, lea e ta ifo le malologa o loo sili 'ai a le Asia Dragons e 10 i le 7 a Samoa.
Ae i le afa mulimuli o le taaloga na finau mai ai Samoa ma sosoo ai ana sikoa. E mae'a ifo lea taaloga o Samoa 27 Asia Dragons 10.
O le suegasiamupini na taaalo ai Samoa ma le au a Niu Sila lea e iai foi nisi alo Samoa o loo taaalo mai ai. Sa vaaia ai le malosi tele o Niu Sila lea na o latou faamo'amo'a le au a Samoa e 33-0.
E ui e lei manumalo le au a le atunuu i lea taamilosaga, ae o se tulaga mataina le sao atu ai lea o le au a Samoa i le final. O le faiaoga a le au o le faiaoga fo'i lea a le au a le Tama Uli mai i Salelologa, Matamua Junior Salima.
O se tasi foi o sui iloga o le Pulega a le 'au, o le sa avea muamua ma fetu o le lakapi a Samoa 7, Reupena Levasa, sa fai ma sui o le polokalame ua taua o le Lakapi a Tama Aoga a le Matagaluega o Aoga, Taaloga ma Aganuu.
O le taimi muamua lenei talu ona amata lea tauvaga i le 2016 ua saofaga atu ai Samoa i le suegasiamupini o lea taamilosaga, ma e ui ina le tau lau o le faamoemoe i le fia manumalo ai lea i le Ipu Autu, ae peitai o se tulaga ua avea ma mitamitaga mo le au tapuai ma le au lagolago a Samoa.