TOFIA CARMEN TAUSILI AUAI I SE AOGA MUSIKA I NIU SILA

(L-R) Constable Muao Seiuli , Constable Carmen Tausilu , Police Commissioner Auapaau Logoitino Filipo, Deputy Commissioner Papalii Monalisa Tiai-Keti

Ata Pueina: Matagaluega o Leoleo ma Falepuipui / Facebook

Ua tofia nei e le Matagaluega o Leoleo ma Falepuipui le alii ia Constable Carmen Tausili e malaga i Niu Sila mo le 10 masina , ina ia
auai i le a'oga musika i lalo o le fa'amalumaluga o le New Zealand Army's Band School of Music.

O lenei aoga o loo i lalo o le faamalumaluga o le polokalame ua taua o le "New Zealand Mutual Assistance Programme" , lea e faapea e
a'oa'oina ai le musika faaili mo leoleo. Ua talia nei e  Constable Carmen Tausili le valaau ma ua sauni e auai i lenei a'oa'oga taua.

Sa faalia le faafetai tele o le Afioga le alii Komesina ia Auapaau Logoitino Filipo i le faalapotopotoga mai Niu Sila ( NZ Army) mo le
avanoa faa'auro ua ofoina mai mo le matagaluega o Leoleo ma Falepuipui. Sa ia fautuaina fo'i le alii leoleo ia Carmen Tausili ina
ia faaaogaina tatau lenei faamanuiaga ua maua.

Sa folasia fo'i nisi o vaega ua mafua ai ona toe faia ai nei malaga faigaluega i atunuu mamao , e tusa ai ma le feagai ai o Samoa ma le
lalolagi i le faama'i pipisi o le Koviti-19 , o le ala lea na taofia ai lenei polokalame.

O le alii ia Constable Carmen Tausili ua 35 nei ona tausaga , ma ua 10 tausaga talu ona tautua i lalo o le vaega tau fa'aili ma musika i le
Ofisa o Leoleo ma Falepuipui. Tusa ai ma se fa'amatalaga mai ia Carmen Tausili, o lea avea lenei avanoa e apoapoa'i ai tomai ma agava'a fou
ina ia faaleleia atili ai le vaega au musika a leleo Samoa.