Tu'uitiitia Totogi O Resitala A Le N.U.S

Iunivesete Aoao o Samoa i Le Papaigalagala

Ata Pueina : NUS

Ua fa’ailoa mai e le Iunivesete Aoao o Samoa i Le Papaigalagala le fa’aitiitia ai lea o le pili mo le resitalaina o fanau aoga mo lenei tausaga.

Na fa'aalia i se fa'asalalauga a le Iuniveste i luga o upega tafailagi e faapea o le totogi mo le resitala o lenei tausaga ua iai nei i le $122 tala.

O lona uiga, o tamaiti a'oga uma o le a resitala ia Ianuari mo le tausaga atoa I polokalame a le Iunivesete mo le Semesa 1 ma le 2, e na'o le faatasi ona totogiina le resitala, nai lo le toe totogiina o le isi pili ile Semester 2.

O le $122 tala ua iai nei le pili o le resitala o se pa'ū telē lea mai i le $322 tala e pei ona masani ai i tausaga ua tuana'i.

Na taua e se tasi o tina o loo fuafua e faaa'e lona alo i le Iunivesete ia Moli Ausage mai i Vaitele o se faamama avega tele lea mo matua i lenei tausaga ona o le a sefe ai foi sina seleni aua le totogiina o pili mo mataupu i lenei tausaga.

O le pili o le resitala o lenei tausaga e aofia ai le paketi (enrollment package) faaletausaga e $61 tala faapea foi ma le pili faaletausaga a le asosi a tamaiti aoga e $61 tala.

O le faagasologa o le resitalaina o fanau aoga o le a amataina i le vaiaso fou mai le Aso Gafua 23 i le Aso Faraile 27 Ianuari, i le faleta'alo a le Iunivesete i Le Papaigalagala mai le 9am i le 3pm. O le totogi o le tuai ona resitala o le a amata fa'amalosia mai le Aso Gafua 30 Ianuari se'ia o'o i le aso 03 o Fepuari.