14 MATAUPU FOU TAU KOVITI

Photo by : Anetone Sagaga

Ua faailoa mai nei e le Matagaluega o Soifua Maloloina e 14 ni tagata  ua faamaonia ua maua i le koviti tusa ai ma se ripoti na tuuina mai.

I se suesuega (surveillence) na faatinoina i le vaiaso ua mavae , sa fa'amauina ai e le Matagaluega  ina ua uma ona faagasolo ia RAT (Rapid Antigen Test) mai le Aso 8 i le Aso 15 o Ianuari e 14 ni mataupu fou tau koviti ua o latou faamauina. 

I ni faamaumauga mai aso ua tuana'i , o loo ripotia mai ai nei e le Matagaluega nisi o fuainumera sa iai le atunu'u a'o feagai ai ma le fa'amai oti.

O suesuega na faatinoina mo malaga mai atunu'u mamao , lea na amatalia mai le masina o Novema  o le tausaga ua mavae seia oo mai nei , o lo'o tumau lava i le 192 (cases). O le malae vaalele i Faleolo ma le Uafu i Matautu o loo faasaga iai nei fa'amaumauga. 

A'o fa'amaumauga fo'i mo tagata i nei Samoa na maliliu mai lenei faama'i , o lo'o tumau pea i le 29 e tusa ai ma lipoti faamauina mai le tausaga 2022 i le masina o Iuni aso 20.

E le'o iai nisi o maliliu mai i nei mataupu fou e 14 , e le'o iai foi nisi o avea ma ni mataupu tūgā pe tigaina fo'i (ICU Admission).Tusa ai ma ripoti na tuuina mai e le Matagaluega , e 182,397 ia suesuega(tests) na faatinoina i tagata Samoa talu mai le masina o Aukuso o le tausaga ua mavae (2022). 

I nei ripoti o loo aofia ai nei le aofa'i o tui puipui lona tolu (Booster Shots)na faatinoina, lea e faapea e 79,451 tagata ua uma ona tui, ma siitia ai i le 53% tagata Samoa ua ma'ea ona fai o latou tui puipui.

O lo'o faamauina nei e le Matagaluega o tamaiti e 12-17 tausaga le matua , o lo'o siliga nei lea vaega i le kalafi mo tagata ua ma'ea ona faia tui puipui muamua ma le tui puipui lona lua. 

Ae mo tausaga e 5-11 le matua ua ausia nei le 100% ua ma'ea ona faia tui puipui muamua. Ae 92% ua ma'ea ona fai tui puipui lona lua. O i latou e 18tausaga ma luga atu ua atoa le 100% mo le tui puipui muamua ae 92% le siliga ua ma'ea ona faia tui puipui lona lua.