Sainia e le Broncos Martin Taupa'ū
(Photo - Fox Sport)Ua sauni nei se tasi o alo o le atunu'u o se sui foi o le Toa Samoa ia Martin "Marty" Taupa'ū e ta'alo ai mo le tasi le tausaga i le au a le Brisbane Broncos.
Na fa'alauiloa mai e le Iuni Lakapi Liki (N.R.L) a Ausetalia le sainia lea o Taupa'ū e le kalapu a le Brisbane Broncos i le Aso Faraile ua mavae atu nei.
O lea faasilasilaga mai i le N.R.L o lo'o ta'ua ai fo'i o le auai ai o Taupa'ū i le au a le Broncos i lenei tausaga o le a telē le tomai po'o le experience o le a maua ai e le laina i luma po'o foueti a le Broncos ona o Taupa'ū ua 222 ana taaloga i le ta'amilosaga o le N.R.L.
Na taua e le Faia'oga Ulu o le au a le Broncos ia Kevin Walters o Taupa'ū na amata taalo i le N.R.L i le Tausaga e 2010, o lona uiga o le a telē le tomai ma nisi o lesona o le a ia faasoa atu i sui o le au o lo'o iai nei.
" E fai si toatele o a matou players o loo taaalo i lea tulaga o le foueti ogatotonu po'o le middle forward, ma o le auai mai o Marty o se avanoa taua mo i latou e tapue mai ai le tomai mai ia Marty.
Na lipotia talu ai nei e le News Corporation e faapea o le alii ia Martin Taupa'ū sa i ai i le konekarate e $800,000 mo le Manly Sea Eagles ae peitai e lei toe faafouina, ma o'o ai ina saili sana kalapu e auai ai mo le tauvaga a le N.R.L i lenei tausaga.