29,000 LE PASESE UA TAOFIA O LATOU MALAGA

Air New Zealand

Ata Pueina: AFP

E ova atu ma le 29,000 tagata pasese ua aafia nei o latou malaga i le Air New Zealand ona o aafiaga o auala o femalaga'i o loo feagai ai nei le kamupani vaalele ma le Afā o Gabrielle. 

I ni faasalalauga na tuuina i luga o upega tafa'ilagi , sa faailoa ai e le Air New Zealand i nisi o ana tagata malaga ia utagia le latou fautuaga. Talu ai le louloua ma le leaga o le tala o le tau sa fautuaina ai le mamalu ina ia lava le onosa'i.

Tusa ai ma le faasalalauga e faitauina e 500 ni malaga ua aafia ma e toatele nisi ua aafia o latou malaga.  "O loo galulue punoua'i le aufaigaluega o le Air New Zealand e feluga'i malaga mo le toatele ua aafia" tusa ai ma le faasalalauga. 

O lo'o galulue faatasi nei le Air New Zealand ma nisi o Malae Vaalele faavaomalo ma Auala o Femalaga'i luga o le ea ina ia faafaigofieina le mataupu ua tula'i mai nei. 

O le a iai foi nisi o vaa o le'ā faaopopo i nei malaga fou mo le mamalu o pasese ua aafia nei. I nisi o faasalalauga mai le Air New Zealand , o lo'o taumafai nei le latou aufaigaluega ina ia faataunuuina malaga o nei tagata ua aafia. 

O loo tumau pea foliga louloua o le tau i Aoteroa Niu Sila i luga o Aukilani ma o loo fautuaina pea le saogalemu o le mamalu o le atunuu.